ევროკომისარმა საგარეო და უსაფრთხოების საკითხებში კაია კალასმა ევროკავშირის საგარეო მინისტრების შეხვედრის შემდეგ ისაუბრა იმ პუნქტებზე, რომლებიც „ქართული ოცნებისადმი” გაგზავნილ წერილშია.
როგორც მან თქვა „საუბარია იმ ვალდებულებებზე, რომლებიც საქართველოს ხელისუფლებას აქვს. მათ შორის საქართველოს ყველა მოქალაქის ფუნდამენტური უფლებების უზრუნველყოფა, შეკრებისა და გამოხატვის თავისუფლება, პირადი ცხოვრების ხელშეუხებლობა, საჯარო დისკუსიებში მონაწილეობის უფლება, დისკრიმინაციის აკრძალვა”.
კაია კალასი განმარტავს, რომ ეს მხოლოდ ნაწილია იმ მოთხოვნებისა, რომლებიც ევროკავშირს საქართველოს ხელისუფლებისადმი აქვს.
ის ამბობს, რომ ამ პირობების დაუკმაყოფილებლობის შემთხვევაში „შედეგები იქნება”.
„ვადა აგვისტოს ბოლომდეა. ვნახავთ, როგორი რეაგირება იქნება და თუ ეს რეკომენდაციები არ შესრულდება, მოგვიწევს ვიმოქმედოთ”, – განაცხადა კაია კალასმა.
მან ასევე განაცხადა, რომ საქართველოში 7 ოპოზიციონერი ციხეში იმყოფება და ეს არ შეესაბამება ევროკავშირის მოთხოვნებს.
„აქამდე ჩვენი პოზიცია იყო, რომ არ გვსურდა ქართველი ხალხისთვის უვიზო რეჟიმის წართმევა, რადგან ამას მათთვის სარგებელი მოჰქონდა. თუმცა საქმე ეხება ევროკავშირის სანდოობის საკითხსაც. თუ ჩვენ ვითხოვთ ამ მიდგომებს და ისინი არ აკმაყოფილებენ, დადგება შედეგებიც. შედეგები იმისთვისაც, რომ საზოგადოებამ დაინახოს: მათი მთავრობა არაა ევროპულ გზაზე და კანდიდატის სტატუსს სერიოზულად არ ეკიდება”, – თქვა კაია კალასმა.
