რუსთავის ქალთა კოლონიასთან, იქ, სადაც ჟურნალისტი მზია ამაღლობელი წინასწარ პატიმრობაში იმყოფება, განცხადება გააკეთეს პრესის თავისუფლების საერთაშორისო ორგანიზაციების წარმომადგენლებმა.
ორგანიზაციების „ჟურნალისტთა დაცვის კომიტეტი”, „პრესის საერთაშორისო ინსტიტუტი”, „რეპორტიორები უსაზღვრებოდ” წარმომადგენლები საქართველოში სპეციალურად ჩამოვიდნენ, რათა დაესწრონ ბათუმის საქალაქო სასამართლოში მზია ამაღლობელის პროცესს, რომელიც 14 ივლისს გაიმართება.
როგორც 13 ივლისს უფლებადამცველებმა კოლონიასთან გამართულ ბრიფინგზე თქვეს, ისინი იმყოფებიან აქ, რათა „ყველაზე ბნელ დროს” მზია ამაღლობელს უთხრან:
„შენ გვერდით ვართ და არ დავნებდებით, სანამ არ გათავისუფლდები”.
„მზია მხედველობას კარგავს. რა სასტიკი უსამართლობაა, რომ ჟურნალისტმა, რომელიც თავად სინათლის შუქურა იყო, უნდა დაკარგოს მხედველობა. ეს მაშინ, როდესაც იმ სამართალდამცველებისთვის, რომლებმაც სასტიკად იძალადეს დემონსტრანტების მიმართ, შედეგები არ დამდგარა”, – განაცხადა ჯიპსი გიენ-კაიზერმა ჟურნალისტებთან საუბრისას.
„პრესის საერთაშორისო ინსტიტუტის” წარმომადგენელმა ემი ბრულეთმა ყურადღება გაამახვილა საქართველოში არსებულ ვითარებაზეც და თქვა, რომ მზია ამაღლობელი დააკავეს მაშინ, როდესაც „ქვეყნის დამოუკიდებელი მედია მზარდი ზეწოლის ქვეშაა და ღრმა შეშფოთებას იწვევს დემოკრატიული უფლებებისა და თავისუფლებების დარღვევა”.
მისივე თქმით, მზიას საქმე მნიშვნელოვანია იმიტომაც, რომ ის არის პირველი ქართველი ჟურნალისტი ქალი დამოუკიდებელი საქართველოს ისტორიაში, რომელიც პოლიტიკური მოტივით დააკავეს.
მზია ამაღლობელის საქმის გარემოებებზე ისაუბრა ჟანა კაველიემაც, რომელიც წარმოადგენს ორგანიზაციას „რეპორტიორები უსაზღვრებოდ”. მან თქვა, რომ მზია ამაღლობელის დაკავება „არა მხოლოდ უსამართლო, არამედ აღმაშფოთებელია”.
„და რა არის მისი ე.წ. „დანაშაული”? საპროტესტო სტიკერის გაკვრა. სიმბოლური ჟესტი. ამისთვის მას სისხლის სამართლის საქმეს ედავებიან. ედავებიან, რომ პოლიციელს თავს დაესხა და კიდევ ორ ადმინისტრაციულ საქმეს. მისი პროცესის პარალელურად კი არაერთი დარღვევა ხდებოდა, მათ შორის იყო საჯარო თავდასხმა ჟურნალისტზე, თავად პრემიერ-მინისტრის მხრიდანაც”, – განაცხადა ჟანა კაველიემ და დასძინა:
„ეს არის არის სამართლიანობა, ეს რეპრესიაა”.
უფლებადამცველი ორგანიზაციების წარმომადგენლებს მიაჩნიათ, რომ მზია ამაღლობელის დაკავება დაფუძნებულია აბსურდულ ბრალდებებზე და „წარმოადგენს აშკარა განზრახვას, გააჩუმონ კრიტიკული მედია”.
„მოვუწოდებთ ხელისუფლებას, მოხსნას ყველა ბრალდება და დაუყოვნებლივ გაათავისუფლოს მზია ამაღლობელი.
მზია არა მხოლოდ ჟურნალისტი, არამედ სიმბოლოა. სიმბოლო წინააღმდეგობისა და პრესის თავისუფლებისთვის ბრძოლის საქართველოსა და მის საზღვრებს გარეთ. და ის არ არის მარტო. ჩვენ მასთან ერთად ვართ და არ გავჩერდებით, სანამ არ გათავისუფლდება”, – თქვეს უფლებადამცველი ორგანიზაციების წარმომადგენლებმა რუსთავის ქალთა კოლონიასთან.
