რუსეთის მიერ ოკუპირებული უკრაინული ტერიტორიების მომავალთან დაკავშირებით ვრცლად ისაუბრა ჩეხეთის პრეზიდენტმა BBC-სთან, სადაც მან ოკუპირებული აფხაზეთისა და ცხინვალის მაგალითები მოიყვანა.
კერძოდ, უკრაინის მტკიცე მხარდამჭერმა, პეტრ პაველმა კიდევ ერთხელ დაუშვა, რომ შესაძლოა ომში უკრაინას დროებით გარკვეული ტერიტორიების დათმობა მოუხდეს, თუმცა მომავალში მათი დაბრუნების პერსპექტივით.
ნატოს სამხედრო კომიტეტის ყოფილი ხელმძღვანელი აღნიშნავს, რომ ევროპა უკრაინასთან იმუშავებს ევროპულ პოლიტიკაში მისი მაქსიმალურად ინტეგრირებისთვის, რათა საკუთარი კეთილდღეობა გაზარდოს. ეს იქნება გზავნილი დროებით ოკუპირებულ ტერიტორიებზე მცხოვრები მოსახლეობისთვის, იმ პროცესების პარალელურად, რომლებიც მომდევნო ათწლეულებში შესაძლოა რუსეთში წარიმართოს.
უკრაინის მხარდამჭერი გენერალი ასევე საუბრობს იმაზეც, რომ რუსეთისთვის ყველა ოკუპირებული ტერიტორია რეალურად ტვირთი და პოლიტიკური ინსტრუმენტია და ამის მაგალითად მან რუსეთის მიერ საქართველოსგან მიტაცებული რეგიონები, ოკუპირებული აფხაზეთი და ცხინვალი მოიყვანა.
„მიმაჩნია, რომ დასავლეთის სრული მხარდაჭერის მიუხედავად ახლა უკრაინას არ აქვს უნარი, გაათავისუფლოს ოკუპირებული ტერიტორიები მოკლე ვადაში და ხელშესახებად დიდი მსხვერპლის გარეშე. ამასთან, დასავლეთის მხრიდანაც ძალიან უსამართლო იქნება უკრაინას უბიძგოს, გაათავისუფლოს ყველა ეს ტერიტორია. ჩვენ არ გვსურს უკრაინული ერის განადგურება. ჩვენ გვსურს, რომ უკრაინა გადარჩეს როგორც დამოუკიდებელი ერი და არსებობს ფასი, რომელიც მისი აღდგენისთვისაა საჭირო.
თუ ამის ფასი იქნება ის, რომ მისი ზოგიერთი ტერიტორიები იქნება დროებით ოკუპირებული, იურიდიული აღიარების გარეშე, დაე, ასეც იყოს. ჩვენ არასოდეს ვაღიარებთ ამ ოკუპირებულ ტერიტორიებს რუსეთის შემადგენლობაში. ვიტყოდი, რომ ის ნაბიჯები, რომელთა გადადგმაც უკრაინასთან ერთად შეგვიძლია, მოკლე და გრძელვადიანი ხასიათისაა, ნაწილი კი ჯერ ისევ შემუშავების პირობებშია.
თუ უკრაინასთან ერთად შევძლებთ, რომ აღვადგინოთ მისი სუვერენიტეტი ტერიტორიების დიდ ნაწილზე და მოვახერხებთ მის ინტეგრირებას ევროპულ პოლიტიკაში, მის აღდგენას ომის შემდეგ, მის გაყვანას ერთიან ევროპულ ბაზარზე, შევძლებთ უკრაინაში ცხოვრების ხარისხის გაზრდას – მაშინ ეს იქნება ძალიან კარგი გზავნილი იმ ადამიანებისთვის, რომლებიც დროებით ოკუპირებულ ტერიტორიებზე ცხოვრობენ. იმის მიუხედავად, თუ რას ამბობს რუსეთი, ის არ ზრუნავს ამ ხალხზე ისე, როგორც საკუთარ მოსახლეობაზე.
ვფიქრობ, ოკუპირებული ტერიტორიები რუსეთისთვის ტვირთია, რომელსაც ის პოლიტიკურ ინსტრუმენტად იყენებს. შეხედეთ ოსეთსა და აფხაზეთს საქართველოში, ეს რეგიონები რუსეთზე გაცილებით ღარიბები არიან, რუსეთის ხელისუფლება არც კი ცდილობს, ოდნავ მაინც გააუმჯობესოს მათი ცხოვრების ხარისხი.
არავინ იცის, როგორი რეჟიმი იქნება რუსეთში 20-30 წლის შემდეგ. ვლადიმერ პუტინი მარადიული არაა, რუსეთშიც კი ადამიანებს სურთ ღირსეულად ცხოვრება, უნდათ ჰქონდეთ ხარისხიანი ცხოვრება, განათლება, მოგზაურობა, ბიზნესის წარმოება დანარჩენ მსოფლიოსთან. არ მგონია, რუსეთის მოსახლეობას მოსწონდეს იზოლაცია და ასეთი მკაცრი კონტროლი”, – აღნიშნა ინტერვიუში ჩეხეთის პრეზიდენტმა პეტრ პაველმა.
