მთავარისაქართველოპროკურატურამ ალექსი ახვლედიანს თორნიკე რიჟვაძის საქმეზე ბრალი წარუდგინა

პროკურატურამ ალექსი ახვლედიანს თორნიკე რიჟვაძის საქმეზე ბრალი წარუდგინა

საზღვაო ტრანსპორტის სააგენტოს უფროს ალექსი ახვლედიანს პროკურატურამ ბრალი ცეცხლსასროლი იარაღის დაუდევრად შენახვის გამო წაუყენა. ბრალდების მიხედვით, მას სამ წლამდე თავისუფლების აღკვეთა ემუქრება. ალექსი ახვლედიანი ამ დრომდე ზაჰესის დროებითი მოთავსების იზოლატორში რჩება.

„საქართველოს პროკურატურამ ცეცხლსასროლი იარაღის დაუდევრად შენახვის ფაქტზე, რამაც მძიმე შედეგი გამოიწვია, ერთ პირს ბრალდება წარუდგინა.

საქართველოს შინაგან საქმეთა სამინისტროს ცენტრალური კრიმინალური პოლიციის მიერ სისხლის სამართლის საქმეზე ჩატარებული გამოძიებით დადგინდა, რომ 6 ივლისს, საღამოს საათებიდან თ.რ. სტუმრად იმყოფებოდა ქ. საგარეჯოში, თავისი მეგობრის ა. ა.-ს სახლში. 7 ივლისს, დაახლოებით 01:10 საათიდან 01:30 საათამდე პერიოდში, თ.რ.-მ მალულად აიღო ა. ა.-ს კუთვნილი „გლოკის“ სისტემის ცეცხლსასროლი იარაღი, რომელიც ა.ა.-ს დაუდევრად ჰქონდა დატოვებული თავისი საცხოვრებელი სახლის მიმდებარედ არსებულ შემინულ ფანჩატურში, შემდეგ ასევე მალულად გადაიტანა სტუმრისთვის განკუთვნილ საძინებელ ოთახში და მარტო დარჩენილმა თვითმკვლელობის მიზნით ისროლა გულმკერდის არეში, რამაც მძიმე ხარისხის ჯანმრთელობის დაზიანება გამოიწვია.

სამართალდამცველებმა ა.ა. იმავე დღეს დააკავეს. დაკავებულს ბრალდება საქართველოს სისხლის სამართლის კოდექსის 238-ე მუხლით (ცეცხლსასროლი იარაღის დაუდევრად შენახვა, რამაც მძიმე შედეგი გამოიწვია) წარედგინა, რაც სასჯელის სახედ და ზომად სამ წლამდე თავისუფლების აღკვეთას ითვალისწინებს.

პროკურატურა სასამართლოს კანონით დადგენილ ვადაში მიმართავს ბრალდებულისთვის აღკვეთის ღონისძიების შეფარდების მოთხოვნით“, – აღნიშნულია ინფორმაციაში.

ექიმების ინფორმაციით, თორნიკე რიჟვაძის ჯანმრთელობის მდგომარეობა კვლავ სტაბილურად მძიმედ ფასდება.

 

უახლესი

სხვა ამბები

spot_imgspot_img
Send this to a friend