საქართველოს პარლამენტის წინ განცხადება გააკეთეს რვა პოლიტიკური პარტიის წარმომადგენლებმა, რომლებიც ბოიკოტს უცხადებენ თვითმმართველობის არჩევნებს.
ისინი კიდევ ერთხელ ამბობენ, რომ მონაწილეობას არ მიიღებენ თვითმმართველობის არჩევნებში და „მხოლოდ ახალ, თავისუფალ, საპარლამენტო არჩევნებს” აღიარებენ.
მათი თქმით, ისინი უპირისპირდებიან „კორუმპირებულ და ანტიდემოკრატიულ რეჟიმს, რომელიც საფრთხეში აგდებს საქართველოს ეროვნულ დამოუკიდებლობასა და საქართველოს მოქალაქეების თავისუფლებას”.
„მშვიდობისა და სტაბილურობის მთავარ საფრთხეს დღეს ივანიშვილის პოლიტიკური დაჯგუფება წარმოადგენს, რომელმაც მიიტაცა ძალაუფლება და ცდილობს თავისუფალი საზოგადოების დამორჩილებას, ნაცვლად იმისა, რომ ანგარიშვალდებული იყოს და ემსახუროს მას.
„ქართული ოცნება” ცდილობს ბანდიტური წყობილების დამყარებას ქვეყანაში და 90-იანი წლების ძალმომრეობის ქაოსში გვაბრუნებს”, – წერია განცხადებაში, რომელსაც პოლიტიკური პარტიები ავრცელებენ.
მათ მიაჩნიათ, რომ უსაფრთხო, დაცული და ღირსეული ცხოვრება შესაძლებელია მხოლოდ ევროპული ტიპის დემოკრატიაში, „სადაც კანონი, სასამართლო და ხელისუფლება ემსახურება ხალხს და არა კორუმპირებულ ჩინოვნიკებს”.
პოლიტიკური პარტიები განმარტავენ, რომ გადაწყვეტილი აქვთ, ბოლომდე უერთგულონ „ავტორიტარულ რეჟიმთან დაპირისპირებულ სახალხო წინააღმდეგობის მოძრაობას” და ამ მიზნით 19 ივლისს საპროტესტო აქციის გამართვას გეგმავენ.
