დაახლოებით 14 საათი გავიდა მას შემდეგ, რაც აჭარის მთავრობის ყოფილი თავმჯდომარე თორნიკე რიჟვაძე საგარეჯოს ერთ-ერთი საავადმყოფოდან თბილისში, პირველ საუნივერსიტეტო კლინიკაში, გადმოიყვანეს. მისი ჯანმრთელობის მდგომარეობის შესახებ კომენტარი რამდენიმე საათის წინ გააკეთა კლინიკის დირექტორმა ლევან რატიანმა, მან თქვა, რომ მისი მდგომარეობა დადებითი დინამიკით მიმდინარეობს და თორნიკე რიჟვაძეს უტარდება ის სამკურნალო ღონისძიებები, რაც პროტოკოლითაა გათვალისწინებული.
„პაციენტი შემოყვანილია დღეს დილით, დაახლოებით 06:30 საათზე. გადმოიყვანეს სხვა კლინიკიდან, მდგომარეობა შემოსვლისას იყო საკმაოდ მძიმე, ვინაიდან კლინიკურად სახეზე იყო ტრავმულ-ჰემორაგიული შოკის კლინიკა. ამ წუთში მისი მდგომარეობა დადებითი დინამიკითაა, ვინაიდან შოკის ხარისხი შემცირებულია, ჰემოდინამიკის პარამეტრები მეტ ნაკლებად აღდგენილია, იმყოფება მართვით სუნთქვაზე, უტარდება ის სამკურნალო ღონისძიებები, რაც პროტოკოლითაა გათვალისწინებული“,- განაცხადა ლევან რატიანმა.
ექიმების განმარტებით, თორნიკე რიჟვაძეს ფილტვი აქვს დაზიანებული და გულმკერდის არეში აქვს ერთი ჭრილობა.
საგარეჯოდან თბილისში თორნიკე რიჟვაძის გადმოყვანის შემდეგ კლინიკაში მივიდა ყოფილი პრემიერ-მინისტრი ირაკლი ღარიბაშვილი მეუღლესთან ერთად, ჯანდაცვის მინისტრი მიხეილ სარჯველაძე და აჭარის უმაღლესი საბჭოს წევრები. ირაკლი ღარიბაშვილს მედიასთან კომენტარი არ გაუკეთებია, თუმცა მედიასთან ისაუბრა მიხეილ სარჯველაძემ. მან განაცხადა, რომ ეს ამბავი მძიმე, შოკისმომგვრელი და თავზარდამცემია ყველასთვის და ყველაფერს აკეთებენ ექიმები იმისთვის, რომ შეუნარჩუნონ ჯანმრთელობა.
„ის ამჟამად იმყოფება რეანიმაციულ განყოფილებაში, ვინაიდან ძალიან მძიმე ტრავმები არის სახეზე. რა თქმა უნდა, სჭირდება ინტენსიური მკურნალობა. ბუნებრივია, ამ დროს აუცილებელია გარკვეული პრევენციული ღონისძიების ჩატარება, სამედიცინო თვალსაზრისით, რაც აუცილებელია სიცოცხლის გადარჩენისთვის, ჯანმრთელობის შენარჩუნებისთვის უკლებლივ ყველაფერი უკეთდება თორნიკე რიჟვაძეს. ძალიან მძიმე, შოკისმომგვრელი ამბავი იყო ყველასთვის. ყველაფერს აკეთებენ ექიმები იმისთვის, რომ შენარჩუნდეს ჯანმრთელობა”, – განაცხადა ჯანდაცვის მინისტრმა მიხეილ სარჯველაძემ.
შსს-მ გაავრცელა ინფორმაცია, რომ გამოძიება დაწყებულია სისხლის სამართლის კოდექსის 115 მუხლით, რაც თვითმკვლელობამდე მიყვანას გულისხმობს.
აგრეთვე დღესვე, 7 ივლისს, გახდა ცნობილი, რომ შსს-მ 238-ე მუხლის, ანუ ცეცხლსასროლი იარაღის დაუდევრად შენახვის ბრალდებით, საზღვაო ტრანსპორტის სააგენტოს დირექტორი ალექსი ახვლედიანი დააკავა, რომლის მეგობარიც გახლავთ თორნიკე რიჟვაძე და რომლის სახლშიც იმყოფებოდა ის, სანამ საგარეჯოს „ჯეოჰოსპიტალში” გადაიყვანდნენ.
ალექსი ახვლედიანის ადვოკატმა ლალი აფციაურმა რამდენიმე საათის წინ გააკეთა კომენტარი მედიასთან. მან განაცხადა, რომ მისი დაცვის ქვეშ მყოფს ბრალი წარდგენილი არ ჰქონდა ოფიციალურად და მას ამის გამო საქმის მასალებთან წვდომა არ ჰქონდა.
„ხანმოკლე ვიზიტი მქონდა გამომდინარე იქიდან, რომ რთულია ახლა ამ ადამიანთან საუბარი, ისეთი სტრესი აქვს მიღებული. ვერ დაველაპარაკე, უმძიმეს მდგომარეობაშია. კითხვაც ვერ დავუსვი, უბრალოდ მოვიკითხე ჯანმრთელობის მდგომარეობა და ხომ არაფერი ესაჭიროებოდა ამ ეტაპზე, რაიმე დახმარება ხომ არ სჭირდებოდა”, – განაცხადა ალექსი ახვლედიანის ადვოკატმა ლალი აფციაურმა.
დღეს, 7 ივლისს, დილით შინაგან საქმეთა სამინისტრომ გაავრცელა ინფორმაცია, რომ საგარეჯოს „ჯეოჰოსპიტალსში“ შეიყვანეს აჭარის მთავრობის ყოფილი თავმჯდომარე თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა. მათივე ინფორმაციით, თორნიკე რიჟვაძეს ჩაუტარდა გადაუდებელი სამედიცინო დახმარება. მოგვიანებით კი, ის საგარეჯოდან პირველ საუნივერსიტეტო კლინიკაში გადმოიყვანეს.
თორნიკე რიჟვაძე აჭარის მთავრობის თავმჯდომარე იყო 2018 წლის ივლისიდან, ის თანამდებობიდან 2025 წლის 4 აპრილს გადადგა.
