ისე, როგორც ამერიკაში…
ია კაპანაძისა და ჯონსონ ბუქუზის ქართულ-ამერიკული ოჯახი, შეერთებული შტატების დაბადების, იმავე დამოუკიდებლობის 249-ე წლის აღსანიშნად, ტრადიციულად პიკნიკზე შეიკრიბა. საქართველოში ამერიკის საელჩოს ეზოში მოწყობილ ღია სივრცეში, ასეთი მრავალი ოჯახი მივიდა. ამბობენ, რომ სხვა ქვეყანაში, თუმცა ნამდვილ ამერიკულ გარემოში ამ დღის აღნიშვნა ტრადიციულ ემოციებთანაა დაკავშირებული. ევრონიუს ჯორჯიას თავიანთი ოჯახის შექმნის ისტორიას უყვებიან და ამბობენ, რომ დამოუკიდებლობის აღნიშვნა მათთვის დიდი ზეიმია.
„მე წარმოშობით ნიუ-იორკიდან ვარ. საქართველოში 12 წლის წინ ჩამოვედი საქმიანი ვიზიტით. მე წარმოვადგენ საქართველოში ამერიკის სავაჭრო პალატის ამერიკულ მხარეს. ასევე ერთ-ერთ ქართულ უნივერსიტეტში ლექციებს ვკითხულობ. აქ გავიცანი ჩემი მეუღლე ია და ეს მშვენიერი ოჯახი შევქმენით. ჩემთვის საქართველო მეორე სახლია და ამით ნამდვილად ვამაყობ. რაც შეეხება 4 ივლისის დღესასწაულს. ეს არის უდიდესი ტრადიცია, რაც ჩემი მშობლიური ქვეყნის დიდებულ დაარსებას ნიშნავს. ამიტომ მხიარულებით აღინიშნება ყოველთვის. ეს ჩვენი ოჯახური ტრადიციაა, ისევე როგორც ყველა ამერიკელის. მიხარია, რომ აქ შევიკრიბეთ პიკნიკზე“, – ამბობს ჯონსონ ბუქუზი.
თბილისში, ამერიკის შეერთებული შტატების საელჩოს ტერიტორიაზე, საქართველოში ამერიკის სავაჭრო პალატის ორგანიზებით, საზეიმო პიკნიკი გაიმართა. 2000-ზე მეტი სტუმარი, ათობით ქართული და საერთაშორისო კომპანიის წარმომადგენლობა და ანიმატორების მთელი შემადგენლობა, ერთობლივად აღნიშნავდნენ მეგობარი ქვეყნის დაარსებისა და დამოუკიდებლობის დღეს.
„მიმაჩნია, რომ დღეს განსაკუთრებული დღეა. უნიკალურია ის პრინციპები, რაზეც ამერიკის სახელმწიფო შეიქმნა. ეს არ იყო ტერიტორიული და რელიგიური გაერთიანება, პილიგრიმები იქ მიდიოდნენ იდეისათვის. სწორედ იდეის გარშემო შეიქმნა სახელმწიფო, რომელმაც მსოფლიოს ისტორიაში ბევრი რამ შეცვალა“, – განაცხადა AmCham Georgia-ს პრეზიდენტმა ირაკლი ბაიდაშვილმა.
ამერიკის დამოუკიდებლობის დღეზე ისაუბრა საქართველოში შეერთებული შტატების ელჩმა რობინ დანიგანმა. მისი განცხადებით, საქართველოში ბევრმა ძალიან კარგად იცის, თუ რას ზეიმობს ამერიკა – დამოუკიდებლობას, ღირსეულ პარტნიორობასა და მეგობრობას, მათ შორის საქართველოსთან.
„გილოცავთ დამოუკიდებლობის დღეს. ყველა ამერიკელს ვულოცავ ოთხ ივლისს. ასევე მათაც ვულოცავ, ვისაც უყვარს ამერიკა და ამ დღეს გვილოცავს. ვზეიმობთ დამოუკიდებლობასა და ძლიერ პარტნიორობას. ვულოცავ ყველას პარტნიორობის დღეს. ამერიკის სავაჭრო პალატა ძალიან ბევრს აკეთებს ქართულ და ამერიკულ ბიზნესს შორის პარტნიორობისთვის. ამას კი ორივე ქვეყნისთვის კეთილდღეობა მოაქვს. ეს აძლიერებს დემოკრატიასაც, რაც არის თავისუფლების ქვაკუთხედი“, – განაცხადა რობინ დანიგანმა.
პიკნიკი ამერიკულად, მუსიკალური და სპორტული კუთხეები, გამოფენები, ბევრი ფერები და მხიარულება – სწორედ ასე აღნიშნავენ ამერიკელები ამერიკაში და სხვა ქვეყნის მიწაზეც თავიანთი ქვეყნის ეროვნულ დღესასწაულს, რაც თავისუფლებასთან, დემოკრატიასა და თანასწორობასთანაა დაკავშირებული.
245 წლის წინ, 1776 წლის 4 ივლისს ქვეყნის კონგრესმა, ბენჟამენ ფრანკლინის მეთაურობით, დამოუკიდებლობის დეკლარაციას მოაწერა ხელი. ამ დღეს, 13-მა კოლონიამ ინგლისისაგან დამოუკიდებლობა გამოაცხადა. ამის შემდეგ კი შტატების რაოდენობა გაიზარდა და დღეს 50-ს შეადგენს. ამ ქვეყნის დროშაზე გამოსახული ვარსკვლავებიც სწორედ შტატების რაოდენობას აღნიშნავს.
ავტორი: ალეკო გვეტაძე
