აჭარის მთავრობის ყოფილი თავმჯდომარის შესახებ რამდენიმე მედიასაშუალებამ გაავრცელა ინფორმაცია, რომ თითქოს იმ კლინიკის სამედიცინო პერსონალმა, სადაც თორნიკე რიჟვაძე თავდაპირველად გადაიყვანეს, მისი წერილი იპოვა.
თავდაპირველად გამოცემა „პრაიმ ტაიმმა“, შემდეგ კი ტელეკომპანია „იმედმა“ გამოაქვეყნეს წერილის ტექსტი, თუმცა მასალას თავად წერილის ფოტოსურათი თანდართული არ აქვს. ამ ტექსტის მიხედვით, თორნიკე რიჟვაძე იმედს გამოთქვამს, რომ ბიძინა ივანიშვილი და ირაკლი კობახიძე მის ოჯახს დაიცავენ – „მიზეზი ერთია, მაბრალებენ იმას (კორუფციას და ბარიგების მფარველობას), რასაც მთელი ცხოვრება ვებრძოდით მეც და მამაჩემიც“, – წერია გამოქვეყნებულ ტექსტში.
ამ ინფორმაციის გამოქვეყნების შემდეგ გამოცემა „ბათუმელებმა“ გაავრცელა ცნობა, რომლის მიხედვითაც, საგარეჯოს კლინიკა უარყოფს წერილის ჟურნალისტებისთვის მიწოდების ფაქტს. ეს სწორედ ის კლინიკაა, სადაც ცეცხლნასროლი ჭრილობით თორნიკე რიჟვაძე თავდაპირველად გადაიყვანეს.
ამ თემასთან დაკავშირებით გამოხმაურებები არ წყდება. საქართველოს ყოფილი პრემიერ-მინისტრი და პარტია „გახარია საქართველოსთვის“ დამფუძნებელი, გიორგი გახარია სოციალურ ქსელში სპეციალურ განცხადებას აქვეყნებს, რომელშიც წერია, რომ განუკითხაობა ყველას შეეხება.
„უმართავი ქაოსი და განუკითხაობა შეგვეხება ყველას. სისხლიანი გარჩევები – ხალხისთვის მოპარული ფულის განაწილებისთვის. მხოლოდ გონიერი მოქმედებითა და სიმართლით გავიყვანთ საქართველოს სამშვიდობოს“, – ნათქვამია „ფეისბუკზე” გავრცელებულ წერილში.
თორნიკე რიჟვაძის ამბავს ეხმაურება საქართველოს პარლამენტის თავმჯდომარეც. შალვა პაპუაშვილმა მომხდარს მედიასთან „მძიმე შემთხვევა“ უწოდა.
„რა თქმა უნდა, მძიმე შემთხვევაა. სწრაფ გამოჯანმრთელებას ვუსურვებ თორნიკე რიჟვაძეს – გამოძიება მიმდინარეობს და ამ შემთხვევის ყველა დეტალი გაირკვევა“, – განაცხადა შალვა პაპუაშვილმა.
აჭარის მთავრობის ყოფილი თავმჯდომარე თბილისის პირველ საუნივერსიტეტო კლინიკაშია გადაყვანილი. ადგილზე იმყოფებოდა ჯანდაცვის მინისტრი მიხეილ სარჯველაძე. ექიმ ლევან რატიანის განმარტებით, ჯანმრთელობის მდგომარეობასთან დაკავშირებით „დადებითი დინამიკაა, თუმცა კვლავ მართვით სუნთქვაზე იმყოფება“.
პირველ საუნივერსიტეტო კლინიკაში თორნიკე რიჟვაძის გადაყვანის შემდეგ ადგილზე მივიდა საქართველოს ყოფილი პრემიერ-მინისტრი ირაკლი ღარიბაშვილი.
შსს-ს ცნობით, გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს.
