საფრანგეთის პრეზიდენტმა ემანუელ მაკრონმა პარიზში, ელისეის სასახლეში, ატომური ენერგიის საერთაშორისო სააგენტოს ხელმძღვანელი რაფაელ გროსი მიიღო.
შეხვედრა დახურულ კარს მიღმა მაკრონის ჰააგიდან დაბრუნების შემდეგ გაიმართა. იგი ნიდერლანდებში იმყოფებოდა, რადგან ნატოს ლიდერების ყოველწლიურ სამიტში მონაწილეობდა.
ნიდერლანდებიდან გამგზავრებამდე მაკრონმა ჟურნალისტებს განუცხადა, რომ გროსისთან ირანის ბირთვული ობიექტებისთვის მიყენებული ზიანი უნდა განეხილა.
შეხვედრის შემდეგ პლატფორმა იქსზე გამოქვეყნებულ პოსტში საფრანგეთის ლიდერმა კიდევ ერთხელ დაადასტურა პარიზის ერთგულება სააგენტოს მიმართ, რომელიც, მისი თქმით, სასიცოცხლოდ მნიშვნელოვან როლს ასრულებს გლობალურ ბირთვულ უსაფრთხოებასა და დაცვაში.
With @rafaelmgrossi, Director General of the @IAEAorg. France stands firmly alongside the IAEA, whose role is vital for nuclear safety and security. It is urgent that the Agency be allowed to resume its mission in Iran. pic.twitter.com/oDXREMsQYE
— Emmanuel Macron (@EmmanuelMacron) June 25, 2025
მან ასევე მოუწოდა თეირანს, სააგენტოს მისიის განახლების უფლება მისცეს. როგორც ცნობილია, ირანის პარლამენტმა მიიღო კანონპროექტი, რომელიც სააგენტოსთან ქვეყნის თანამშრომლობის შეჩერებას ითვალისწინებს.
ირანი აცხადებს, რომ გაეროს ბირთვული ზედამხედველობის ორგანომ არ შეასრულა თავისი მოვალეობები და პოლიტიკურ ინსტრუმენტად იქცა.
ირანმა შეერთებული შტატების თავდასხმის საბაბად დაასახელა გაეროს ორგანოს ბოლო ანგარიში, რომელშიც ნათქვამია, რომ თეირანი სააგენტოსთან შესაბამისად არ თანამშრომლობდა.
ტრამპი აცხადებს, რომ ვაშინგტონის თავდასხმებმა ირანის სამ მთავარ ბირთვულ ობიექტზე მთლიანად გაანადგურა ქვეყნის ბირთვული პროგრამა.
თუმცა, აშშ-ის დაზვერვის წინა ანგარიშში ნათქვამია, რომ თავდასხმებმა მხოლოდ მცირე ზიანი გამოიწვია, რამაც პროგრამა რამდენიმე თვით უკან დახია. ამ დასკვნას თეთრი სახლი არ ეთანხმება.
