„უკრაინაში პაუზა საშუალებას მისცემს რუსეთს, აღადგინოს ძალები და დაიწყოს დაპირისპირება ნატოს ქვეყნებთან” – წერია ლატვიის სახელმწიფო უსაფრთხოების სამსახურის ანგარიშში.
ბალტიისპირეთის კონსტიტუციის დაცვის ბიუროს მიერ გამოქვეყნებულ გასაიდუმლოებულ მოხსენებაში დაზვერვის ოფიცრები აფასებენ, რომ „2025 წელს რუსეთ-ნატოს პირდაპირი სამხედრო დაპირისპირების ალბათობა საკმაოდ დაბალია”, რადგან მოსკოვის ცოცხალი ძალა და რესურსები ამისთვის მოუმზადებელია.
„თუმცა, თუ ომი გაიყინება და რუსეთს აღარ ექნება მნიშვნელოვანი დანაკარგები უკრაინაში აქტიური საომარი მოქმედებების დროს, მოსკოვი შეძლებს გაზარდოს სამხედრო ყოფნა ნატოს ჩრდილო-აღმოსავლეთ ფლანგთან, მათ შორის ბალტიისპირეთში, მომდევნო ხუთი წლის განმავლობაში“, – წერია ანგარიშში.
ამავდროულად, ლატვიის დაზვერვის ანგარიშში ნათქვამია, რომ სანქციები, კაპიტალის გადინება და სხვა ეკონომიკური გამოწვევები „არ გამოიწვევს რუსეთის კოლაფსს, მაგრამ, რა თქმა უნდა, გრძელვადიან პერსპექტივაში დაასუსტებს ქვეყანას როგორც შიდა, ასევე საერთაშორისო დონეზე“.
მათივე ცნობით, ქვეყნის სპეცსამსახურები აქტიურად ავითარებენ თავიანთ შესაძლებლობებს ევროპის მასშტაბით დივერსიული და სხვა ტიპის თავდასხმისთვის.
„მეტწილად სავარაუდოა, რომ რუსული სამსახურები ამოწმებენ ევროპის რეაქციას და უნარს, თავიდან აიცილონ მსგავსი ინციდენტები“, – ამბობს ლატვიური სააგენტო და აფრთხილებს ქვეყნებს, რომ ასეთი ჰიბრიდული ტაქტიკა მოსკოვის სამხედრო დოქტრინის ნაწილია დასავლეთთან სრულფასოვანი კონფლიქტის შემთხვევაში.
