„რომ იარსებო“… – ასეთი განწყობაა თბილისის აგრარულ ბაზრებში აღდგომის დღესასწაულის წინ. მოქალაქეები გაძვირებულ ცხოვრებასა და პროდუქტების ფასებთან შედარებით შეუსაბამო შრომით ანაზღაურებაზე საუბრობენ.
პასქა, კვერცხი, ჩაქაფული – ეს ისაა, რაც საქართველოში სააღდგომო სუფრის განუყოფელი ნაწილია, თუმცა მოვაჭრეთა შეფასებით, ქვეყანაში არსებული სოციალურ-ეკონომიკური მდგომარეობის გამო ბევრისთვის ეს ყველაფერი ფუფუნებაა.
ყოველთვიური ოფიციალური სტატისტიკა აჩვენებს, რომ საქართველოში ინფლაციის მაჩვენებელი დაბალ ნიშნულზეა, მაგრამ მოვაჭრეები და მყიდველები ერთმანეთში თანხმდებიან, რომ მოქალაქეთა უმეტესობის ფინანსური შესაძლებლობა და დახლებზე ასახული რიცხვები სტატისტიკურ მონაცემებთან თანხვედრაში არ არის.
„ხორცი ვიყიდეთ იაფად და მწვანილი ჯდებოდა ძალიან ძვირი, მაგრამ, რას იზამ? ისეთი დღეა აღდგომა, რომ არ იყიდო, არ შეიძლება. ზოგი სესხულობს, ზოგს აქვს, ზოგს არ აქვს, მაგრამ ძალიან ძვირია ბაზარი. არ ვიცი, რით გააქვს ამ ხალხს თავი. ძალიან ბევრი გაჭირვებულია“, – ამბობს მოქალაქე.
მაღალ ფასებსა და მათი ზრდის ტენდენციაზე საუბრისას მოსახლეობის დიდი ნაწილი რამდენიმე მიზეზზე მიუთითებს, ნაწილისთვის ეს მიზეზი პოლიტიკური მდგომარეობაა, ნაწილისთვის არასაკმარისად განვითარებული სოფლის მეურნეობა, ზოგისთვის კი ქვეყნის იმპორტულ პროდუქციაზე დამოკიდებულება.
მიზეზთა მრავალფეროვნების მიუხედავად, აგრარულ ბაზრებში სააღდგომო საყიდლებზე სავაჭროდ მისულ მოქალაქეებს საერთო პრობლემა და კითხვა აქვთ – საკმარისია თუ არა მათი შემოსავალი სააღდგომო სუფრისთვის.
