ერევანში გამართული საზოგადოებრივ-პოლიტიკური ფორუმის ფარგლებში რუსეთის საგარეო საქმეთა სამინისტროს განსაკუთრებულ დავალებათა ელჩმა, როდიონ მიროშნიკმა რუსეთ-სომხეთის ურთიერთობებზე ისაუბრა.
ფორუმზე დიპლომატმა ხაზი გაუსვა ერევნის საგარეო კურსის ცვლილებას და სომხეთის ხელისუფლების მზაობას, დაიწყოს ევროკავშირის გაწევრების პროცესი. მისი თქმით, მსგავსი საგარეო პოლიტიკური ნაბიჯი რამდენიმე წლის წინ უკრაინამაც გადადგა, თუმცა სასურველი შედეგი ვერ მიიღო. რუსი პოლიტიკოსი სომხეთის ხელისუფლებას აფრთხილებს, რომ მათ „ორ სკამზე ჯდომა არ გამოუვათ“.
„რუსეთი ყოველთვის ხაზგასმით ამბობდა: ჩვენ არ ვაპირებთ სახელმწიფოების, მათ შორის სომხეთის შიდაპოლიტიკურ საქმეებში ჩარევას. ეს მათი გადაწყვეტილებაა, თუმცა ყურადღება მიაქციეთ სხვა ქვეყნების ანალოგიურ ქმედებებს.
უკრაინამ დიდი ხნის წინ შეიტანა კონსტიტუციაში ჩანაწერი ევროკავშირსა და ნატოში მისწრაფებებთან დაკავშირებით. რამდენად შორს წავიდა უკრაინა ამ პროცესში? ამიტომ, ვფიქრობ, ასეთი მაგალითებიდან პარლამენტარებმაც და პოლიტიკოსებმაც უნდა გააკეთონ დასკვნები.
ევროკავშირში, ევრაზიულ ეკონომიკურ კავშირსა და კოლექტიური უსაფრთხოების ხელშეკრულების ორგანიზაციაში ერთდროულად ყოფნა, ნაკლებად სავარაუდოა, სომხეთს გამოუვიდეს. ორ სკამზე ჯდომა არ გამოვა. რუსეთის ფედერაცია დაინტერესებულია სომხეთთან, კოლექტიური უსაფრთხოების შეთანხმების ფორმატში ურთიერთობების გაღრმავებით“, – განაცხადა რუსეთის საგარეო საქმეთა სამინისტროს განსაკუთრებულ დავალებათა ელჩმა, როდიონ მიროშნიკმა.
ბოლო თითქმის ერთი წლის განმავლობაში სომხეთსა და რუსეთს შორის პოლიტიკური ურთიერთობა ჩიხში აღმოჩნდა. 26 მარტს, სომხეთის პარლამენტში მმართველი გუნდის უმრავლესობამ მხარი დაუჭირა ევროკავშირში გაწევრების კანონპროექტის მეორე მოსმენას.
საკანონმდებლო ცვლილებებზე ისაუბრა ქვეყნის პრემიერმა, ნიკოლ ფაშინიანმა და განაცხადა, რომ კანონპროექტის დამტკიცება არ გულისხმობს ევროგაერთიანებაში გაწევრების პროცესის ოფიციალურად დაწყებას. მისივე თქმით, ამისთვის საჭირო იქნება საყოველთაო რეფერენდუმის ჩატარება.
არაერთი ექსპერტის შეფასებით, ერევანთან ურთიერთობის დაძაბვა მოსკოვს სტრატეგიულ პოლიტიკურ მარცხს მიაყენებს და სამხრეთ კავკასიაში მის გავლენებს მნიშვნელოვნად შეამცირებს, მითუმეტეს იმ ფონზე, რომ სხვადასხვა საზოგადოებრივი გამოკითხვის თანახმად, სომხეთის მოსახლეობის განწყობები, ევროკავშირში გაწევრების თვალსაზრისით, დადებითია.
