სასოფლო-სამეურნეო ტექნიკის მართვით დაწყებული, ქვანახშირის მაღაროებში მუშაობით დასრულებული – უკრაინელი ქალები სულ უფრო ხშირად საქმდებიან ისეთ სფეროებში, რომლებიც ტრადიციულად მხოლოდ კაცებისთვის იყო განკუთვნილი. ეს ცვლილება მხოლოდ პირადი არჩევანით განპირობებული არ არის. მას შემდეგ, რაც უკრაინაში რუსეთის სრულმასშტაბიანი აგრესია დაიწყო და კაცები ფრონტის ხაზზე საბრძოლველად წავიდნენ, ქვეყნის აღდგენის პასუხისმგებლობა ქალებს დაეკისრათ.
იმ სფეროებში, რომლებშიც კაცები დომინირებენ, ქალების ჩართვა უკრაინის სამთავრობო პოლიტიკის ნაწილიცაა, რომელიც ომითა და მობილიზაციის შედეგად გამოწვეული უმუშევრობის მაღალი დონით განადგურებული ეკონომიკის აღდგენას ემსახურება.
ამ პროგრამაში მონაწილეობს კატერინა კოლიადიუკიც, 19 წლის სტუდენტი, რომელიც ტრაქტორის ტარების კურსს გადის.
„გვეუბნებიან, რომ ქალების ადგილი სამზარეულოშია, სახლში, ბავშვებთან ერთად. ამიტომ ასეთი ინსტრუმენტის შესწავლა დიდი გამოწვევა იყო. მეშინოდა, რომ ტრაქტორის ტარებას ვერ შევძლებდი, მაგრამ ნელ-ნელა მივაღწიე მიზანს. ახლა შემიძლია პრაქტიკულად ნებისმიერი მანქანის ტარება, რომელიც სავარჯიშო მოედანზე გვაქვს. ეს აუცილებელია. როდესაც კაცები ჯარში მიდიან, ქვეყნის აღდგენა ქალებს გვიწევს“, – ამბობს კატერინა.
დნიპროპეტროვსკის ოლქის მაღაროში მუშაობს 37 წლის ირინა ოსტანკო. იგი აქ ომის დაწყების შემდეგ მოვიდა, როდესაც კაცებმა სამუშაო ქვეყნის დასაცავად დატოვეს.
„ადრე აქ ქალები საერთოდ არ იყვნენ. ჩვენ აქ სრულმასშტაბიანი ომის დაწყების შემდეგ მოვედით, როდესაც კაცები ქვეყნის დასაცავად წავიდნენ“, – განმარტავს ირინა ოსტანკო.
იულია სკიჩკო, სამშენებლო ტექნიკის გაქირავების სერვისის ხელმძღვანელი ამბობს, რომ ქალების დასაქმებაზე დიდი ხნის განმავლობაში ოცნებობდა. ეს შესაძლებლობა მას ომის დაწყების შემდეგ საერთაშორისო დაფინანსების წყალობით მიეცა და ამ დრომდე 45 ქალის პროფესიულ გადამზადებაში მონაწილეობდა.
„გვეუბნებოდნენ, რომ გიჟები ვართ; ქალების ექსკავატორებთან მუშაობა შეუძლებელია, ამის უნარები არ აქვთ. თუმცა, ის ქალები, რომლებმაც ჩვენი კურსები გაიარეს, დღეს უკვე სამშენებლო ობიექტებზე მუშაობენ“, – განაცხადა იულია სკიჩკომ.
უკრაინის ეკონომიკის მინისტრის, იულია სვირიდენკოს თანახმად, ომთან დაკავშირებული ემიგრაციისა და მობილიზაციის გამო ქვეყანას სამუშაო ძალის დიდი ნაწილი გამოეცალა და ამჟამად, უმუშევრობის დონე 18%-ს აღწევს.
„მონაცემებს თუ გავეცნობით, ვნახავთ, რომ დასაქმებულთა 51%-ს ქალები შეადგენენ, კაცები კი 49-ს. ვერ ვიტყვი, რომ ომის დაწყებიდან ვითარება მნიშვნელოვნად შეიცვალა, თუმცა შეიცვალა მიდგომა. დამსაქმებლები მეტ მზადყოფნას გამოხატავენ ქალების ასაყვანად ისეთ პოზიციებზე, რომლებშიც ტრადიციულად კაცები დომინირებდნენ. ქალები კი მზად არიან, ახალი ცოდნა, ახალი უნარები შეიძინონ და დასაქმდნენ. ვხედავთ, რომ განსაკუთრებით დიდი მოთხოვნაა ისეთი სექტორებში, როგორებიცაა სამშენებლო და სატრანსპორტო ინდუსტრია, სოფლის მეურნეობა. სახელმწიფო ინსტიტუტები და კერძო ბიზნესები ქალებისთვის სპეციალურ გადასამზადებელ კურსებს ხსნიან“, – განაცხადა უკრაინის ეკონომიკის მინისტრმა იულია სვირიდენკომ.
უკრაინა ომის დაწყების დღიდან 5 მილიონმა მოქალაქემ დატოვა, კიდევ ერთი მილიონი კი შეიარაღებულ ძალებში მსახურობს.
