დიდი ბრიტანეთის დედაქალაქ ლონდონში გამართულ სამიტზე გაჟღერდა სხვადასხვა ხედვა იმის შესახებ, თუ როგორაა შესაძლებელი უკრაინაში მშვიდობის მიღწევა და რუსეთის სრულმასშტაბიანი ომის დასრულება.
აგრეთვე, ლიდერები შეთანხმდნენ, რომ ომის დასასრულებლად შედგენილ გეგმას წარუდგენენ აშშ-ის პრეზიდენტს, დონალდ ტრამპს.
ამასთან დაკავშირებით, გუშინ დიდი ბრიტანეთის პრემიერ-მინისტრმა კირ სტარმერმა სამიტის შემდგომ ისაუბრა და აღნიშნა, რომ ევროპელი ლიდერები შეთანხმდნენ ოთხ პუნქტზე, რომელთა განხორციელებაც ეტაპობრივად იქნება შესაძლებელი.
კერძოდ, ეს პუნქტები ითვალისწინებს უკრაინის სამხედრო-ფინანსური მხარდაჭერის გაგრძელებას; სამშვიდობო შეთანხმების მიღწევის პროცესში უკრაინის მოლაპარაკებების მაგიდასთან ყოფნის აუცილებლობას; მშვიდობის მიღწევის შემდეგ უკრაინის თავდაცვითი შესაძლებლობების გაზრდასა და მშვიდობის უზრუნველყოფის მსურველი ქვეყნების კოალიციის შექმნას.
ევრონიუს ჯორჯია ესაუბრა ანალიტიკური ორგანიზაცია „ჯეოქეისის“ მკვლევარს, ნიკოლოზ ხატიაშვილს, რომელმაც უკრაინის მხარდაჭერის საკითხში, შეერთებული შტატებისა და ევროპის ურთიერთობების სამომავლო პერსპექტივებზე ისაუბრა.
