ცენტრალური ევროპის რამდენიმე ქვეყანაში უამინდობამ წყალდიდობა გამოიწვია. უხვმა ნალექმა პრობლემები შექმნა ავსტრიაში, სლოვაკეთში, პოლონეთსა და ჩეხეთის რესპუბლიკაში. რეგიონებში მობილიზებული არიან შესაბამისი სამსახურების წარმომადგენლები, სტიქიის ზონებიდან მიმდინარეობს მოსახლეობის ევაკუაცია. ბოლო ინფორმაციით, წყალმოვარდნების შედეგად პოლონეთსა და ავსტრიაში არის მსხვერპლი.
ცენტრალურ ევროპას ქარიშხალმა „ბორისმა“ გადაუარა, რამაც წყალმოვარდნები და მოსახლეობის მასობრივი ევაკუაცია გამოიწვია. პოლონეთსა და ავსტრიაში დაიღუპნენ მოქალაქეები, ჩეხეთის რესპუბლიკაში კი ოთხი მოქალაქე დაკარგულად მიიჩნევა.
ჩეხეთის აღმოსავლეთ ნაწილში, მორავიის რეგიონში, ქარიშხალს რეკორდულად უხვი ნალექი მოჰყვა. საჭირო გახდა ათასობით მოქალაქის ევაკუაცია. სტიქიის შედეგად 250 000 აბონენტს არ მიეწოდება ელექტროენერგია.
მოსახლეობა უსაფრთხო ადგილას გადაიყვანეს მეზობელ პოლონეთშიც. სტიქიის ადგილას მობილიზებული არიან შესაბამისი სამსახურების წარმომადგენლები. პოლონეთის პრემიერმა კიდევ ერთხელ მოუწოდა მოქალაქეებს, დაემორჩილონ ევაკუაციის წესებს.
გასულ უქმეებზე ავსტრიაშიც უამინდობამ წყალდიდობა გამოიწვია. ხელისუფლებამ ქვეყნის ჩრდილო-აღმოსავლეთი პროვინცია სტიქიის ზონად გამოაცხადა. ავსტრიის მდინარეებზე წყლის დონემ მნიშვნელოვნად მოიმატა. ქვეყნის სამხრეთშიც ცუდი ამინდია. როგორც ამბობენ, რამდენიმე მდინარე უკვე გადმოვიდა კალაპოტიდან.
ოტენშტაინის რეზერვუარი თითქმის სრულადაა გადავსებული და შესაძლოა წყალი გადმოვიდეს. მიმდინარეობს ევაკუაციისთვის საჭირო სამუშაოები. ვენაშიც მძიმე ვითარებაა. შტორმმა ქალაქს მნიშვნელოვანი ზიანი მიაყენა.
ვენის მერი მიხაელ ლუდვიგი ამბობს, რომ 30 წელზე მეტია მდინარე დუნაიზე მსგავსი ვითარება არ ყოფილა. უხვი ნალექი უფრო შესამჩნევი მდინარე ვენაზეა, სადაც ასეთი მასშტაბური წყალდიდობა 100 წელზე მეტია არ მომხდარა.
სლოვაკეთის დედაქალაქი ბრატისლავაც კვირას წყალმა დაფარა. ქალაქის შესასვლელი ბრატისლავის სტუპავის ციხესთან თითქმის სრულად დაიტბორა. მდინარე დუნაიზე რეკორდული მაჩვენებელი გამოვლინდა. საგანგებო სამსახურებმა დუნაის ნაპირებთან ბარიკადები მოაწყვეს, რათა თავიდან აიცილონ მსგავსი შემთხვევები.
