13 ივლისს პენსილვანიის ქალაქ ბატლერში ამომრჩევლებთან გამართულ შეხვედრაზე დონალდ ტრამპი სიკვდილს გადაურჩა. პრეზიდენტობის სავარაუდო კანდიდატი დამსწრე საზოგადოებას სიტყვით მიმართავდა, როდესაც სროლის ხმა გაისმა.
პირველი გასროლიდან 43 წამის შემდეგ საიდუმლო სამსახურის თანამშრომლებმა თქვეს, რომ თავდამსხმელი, 20 წლის ტომას მეთიუ კრუკსი, მოკლეს.
შემთხვევას ყრილობის ერთ-ერთი მონაწილე ემსხვერპლა, ორი კი კრიტიკულ მდგომარეობაშია.
როგორც თავად დონალდ ტრამპი აცხადებს, იგი მარჯვენა ყურის ზედა ნაწილში დაიჭრა, თუმცა თავს კარგად გრძნობს და ადგილობრივი საავადმყოფო თავდასხმიდან რამდენიმე საათში დატოვა.
თეთრ სახლში გაკეთებულ განცხადებაში პრეზიდენტმა ჯო ბაიდენმა მოსახლეობას მოუწოდა, არ გამოიტანონ წინასწარი დასკვნები თავდამსხმელის მოტივების შესახებ და რომ ქვეყნის პოლიტიკაში ტემპერატურის დაწევაა საჭირო.
„საჭიროა, ჩვენს პოლიტიკაში ტემპერატურის დაწევა და გვახსოვდეს, მიუხედავად იმისა, რომ არ ვეთანხმებით ერთმანეთს, ჩვენ არ ვართ მტრები, ჩვენ ვართ მეზობლები, მეგობრები, თანამშრომლები, მოქალაქეები და რაც მთავარია, ჩვენ ამერიკელები ვართ, ერთად უნდა დავდგეთ.
უთანხმოება გარდაუვალია ამერიკულ დემოკრატიაში, ეს ადამიანის ბუნების ნაწილია, მაგრამ პოლიტიკა არასოდეს უნდა გახდეს პირდაპირი ბრძოლის ველი, ან ღმერთმა ნუ ქნას, მკვლელობის ველი“, – განაცხადა ჯო ბაიდენმა, აშშ-ის პრეზიდენტმა.
დონალდ ტრამპზე თავდასხმას გამოეხმაურნენ მსოფლიო ლიდერები. მათ შორის, ევროკომისიის პრეზიდენტმა ურსულა ფონ დერ ლაიენმა და ევროკავშირის უმაღლესმა დიპლომატმა ჯოზეპ ბორელმა მკაცრად დაგმეს პოლიტიკური ძალადობა და განაცხადეს, რომ დემოკრატიაში არ არის მსგავსი ინციდენტის ადგილი.
„ჩვენ ყველანი შოკირებული ვუყურებდით დონალდ ტრამპის, აშშ-ის საპრეზიდენტო კანდიდატის, მკვლელობის მცდელობას. ეს არ არის მხოლოდ საშინელი დანაშაული, ეს ასევე არის ამერიკული დემოკრატიის მკვლელობის მცდელობა. საბედნიეროდ, ტრამპი გადარჩა. მე მინდა მას სწრაფად გამოჯანმრთელება და სრული ძალებით დაბრუნება ვუსურვო, ჩემი მეუღლის, ისრაელის მინისტრებისა და მთელი ისრაელის სახელით”, – განაცხადა ბენიამინ ნეთანიაჰუმ, ისრაელის პრემიერ-მინისტრმა.
Like all Israelis, my wife Sara and I were shocked by the horrific assassination attempt on the life of President Donald Trump.
This wasn’t just an attack on Donald Trump. This was an attack on a candidate for the presidency of the United States. This was an attack on America.… pic.twitter.com/AzeiL78uNU
— Benjamin Netanyahu – בנימין נתניהו (@netanyahu) July 14, 2024
„დონალდ ტრამპის სიცოცხლის მოსპობის მცდელობა საშინელი დანაშაულია, რომელიც აუცილებლად უნდა დავგმოთ. ეს გვიჩვენებს, თუ რამდენად სერიოზული, გლობალური გამოწვევების წინაშე დგას დემოკრატია. ძალადობამ ნებისმიერი ფორმით ვერსად უნდა გაიმარჯვოს. დარწმუნებული ვარ, რომ ამერიკა ამ გამოწვევას გაუმკლავდება. ბატონ ტრამპს სწრაფად გამოჯანმრთელებას ვუსურვებ. ვუსურვებ გამძლეობას ყველას, ვინც დაზარალდა. დაე, ყოველი ბოროტი განზრახვა წარუმატებელი იყოს და ყველამ აღადგინოს უსაფრთხოება, ვისაც ამის გაკეთება ძალუძს“, – ამბობს უკრაინის პრეზიდენტი ვოლოდიმირ ზელენსკი.
I am appalled to learn about the shooting of former U.S. President Donald Trump at his rally in Pennsylvania.
Such violence has no justification and no place anywhere in the world. Never should violence prevail.
I am relieved to learn that Donald Trump is now safe and wish him…
— Volodymyr Zelenskyy / Володимир Зеленський (@ZelenskyyUa) July 14, 2024
20 წლის მამაკაცმა, რომელმაც ყოფილი პრეზიდენტის მკვლელობა სცადა, სამართალდამცავების ყურადღება თავდაპირველად მაშინ მიიპყრო, როდესაც დამსწრეებმა შენიშნეს, რომ იგი ღონისძიების ტერიტორიის მიღმა საეჭვოდ იქცეოდა. თუმცა ოფიცრებმა მისი პოვნა ვერ შეძლეს, მანამ, სანამ იგი სახურავზე არ ავიდა და ცეცხლი გახსნა.
CNN-ის ინფორმაციით, ფედერალური ბიურო დონალდ ტრამპის წინასაარჩევნო შეხვედრაზე მომხდარ თავდასხმას მკვლელობის მცდელობის მუხლით იძიებს. განიხილება შიდა ტერორისტული თავდასხმის შესაძლებლობაც.
ფედერალური ბიუროს თანახმად, თომას მეთიუ კრუქსი მარტო მოქმედებდა და ამ ეტაპზე, ჯერ კიდევ აქტიურად იძიებენ მის ისტორიას. გავრცელებული ინფორმაციით, კრუქსმა AR ტიპის შაშხანა გამოიყენა, რომელიც მისმა მამამ კანონიერად შეიძინა. ასევე მას მანქანაში, რომლითაც ყრილობაზე მივიდა, ბომბის შესაქმნელი მასალაც ჰქონდა.
აშშ-ის მოქალაქეებისა და რიგი ექსპერტების აზრით, მომხდარი ნოემბრის საპრეზიდენტო არჩევნებში დონალდ ტრამპის გამარჯვების შანსებს გაზრდის. თავად ტრამპი კი აცხადებს, რომ 15-18 ივლისს დაგეგმილი „რესპუბლიკელების“ ყრილობაზე წარმოსათქმელი სიტყვა თავდასხმის შემდეგ მთლიანად გადაწერა.
დონალდ ტრამპი ამბობს, რომ ეს ქვეყნის გაერთიანების შანსია და ეს შანსი მას მიეცა.
