მოულოდნელად, პირველად 2012 წლის შემდეგ, უნგრეთის პრემიერ-მინისტრი ვიქტორ ორბანი კიევში ჩავიდა და უკრაინის პრეზიდენტ ვოლოდიმირ ზელენსკის შეხვდა.
ორბანი კიევს ევროკავშირის თავმჯდომარე ქვეყნის ლიდერის რანგში ეწვია.
ერთობლივ ბრიფინგზე ლიდერებმა განაცხადეს, რომ შეხვედრა იყო მნიშვნელოვანი ნაბიჯი დიდი ხნის განმავლობაში დაგროვილი პრობლემების მოსაგვარებლად.
My first trip after assuming the Presidency of the Council of the EU led me to Kyiv for a meeting with President @ZelenskyyUa. I assessed the possibility of a deadline-bound ceasefire, that could provide an opportunity to speed up peace negotiations. I will report my findings to… pic.twitter.com/TqPeDAvsoe
— Orbán Viktor (@PM_ViktorOrban) July 2, 2024
პრობლემები კი ამ ორ ქვეყანას მართლაც ბევრი დაუგროვდა. უნგრეთს უკვე მთელი ისტორია აქვს უკრაინის მხარდასაჭერი რეზოლუციებისა ან დახმარებების დაბლოკვისა და უარყოფის ევროკავშირსა და ნატოში.
თუმცა დღეს ბრიფინგზე ვიქტორ ორბანის რიტორიკა შეცვლილი იყო.
„უკრაინას ყველაფერში წარმატებას ვუსურვებ. უნგრეთის ევროკავშირის თავმჯდომარეობის პირობებში ჩვენ ვართ უკრაინის განკარგულებაში, რაშიც შეგვიძლია დაგეხმაროთ, დაგეხმარებით”, – განაცხადა ვიქტორ ორბანმა.
მისივე თქმით, უკრაინის პრეზიდენტს სთხოვა ცეცხლის შეწყვეტას დასთანხმდეს. მისი აზრით, ცეცხლის შეწყვეტა მოლაპარაკებების ტემპს დააჩქარებდა.
ცეცხლის შეწყვეტაზე ვოლოდიმირ ზელენსკის კომენტარი არ გაუკეთებია. თუმცა აქამდე მან არაერთხელ უარყო ცეცხლის შეწყვეტის შეთავაზება იმ არგუმენტით, რომ რუსეთს გადაჯგუფებისთვის მეტი დრო და საშუალება ექნებოდა.
Today, Prime Minister Viktor Orbán @PM_ViktorOrban and I discussed the most fundamental issues of our neighbourly relations – trade, cross-border cooperation, infrastructure, and energy.
We also talked about the humanitarian sphere – everything that affects the lives of our… pic.twitter.com/6PQzFqWtYw
— Volodymyr Zelenskyy / Володимир Зеленський (@ZelenskyyUa) July 2, 2024
„ვისაუბრეთ, ევროკავშირის დონეზე თანამშრომლობის შესახებ, ასევე იმაზე, თუ რას ველით უნგრეთის თავმჯდომარეობის დროს. ჩვენ უკვე დავიწყეთ ევროკავშირში უკრაინის გაწევრებაზე მოლაპარაკებები და ახლა ვამზადებთ პირობებს ხელშეკრულებისთვის, ეს პროცესი გრძელი და შრომატევადია, მიზნის მისაღწევად საჭიროა დინამიკა და პროგრესი. ყველა ჩვენგანისთვის ძალიან მნიშვნელოვანია, რომ უკრაინის მხარდაჭერა საკმარის დონეზე დარჩეს, განსაკუთრებით რუსეთის ტერორისგან თავდასაცავად. მნიშვნელოვანია, რომ ევროპის ყველა მეზობელ ქვეყანას შორის თანამშრომლობა კიდევ უფრო მჭიდრო გახდეს“, – განაცხადა უკრაინის პრეზიდენტმა ვოლოდიმირ ზელენსკიმ.
დიპლომატიური გაუცხოება, რომლის მოგვარებასაც ახლა კიევში ლიდერები ცდილობენ, რუსეთის უკრაინაში შეჭრის დროს არ დაწყებულა.
ეს ორი ქვეყანა უკვე მრავალი წელია, ვერ თანხმდება უკრაინაში უნგრული უმცირესობების საკითხებზე. თუმცა პროგრესი დღეს ამ მიმართულებითაც იყო.
