გუშინ, პასექის დღესასწაულის ბოლო დღეს, თელ–ავივში ასობით ისრაელელი ქუჩაში გამოვიდა და ცეცხლის შეწყვეტის შეთანხმების გაფორმება და იმ მძევლების დაუყოვნებლივ გათავისუფლება მოითხოვა, რომლებიც ჯერ კიდევ ღაზაში „ჰამასის“ ტყვეობაში არიან.
აქციის მონაწილეებმა გზაზე დიდი ასოებით დაწერეს: „რაფაჰი მოიცდის, მძევლები კი – ვერა“. მომიტინგეებმა ზღვისპირა ქალაქში, პროტესტის ფარგლებში, რომელიც უკვე რამდენიმე კვირაა თითქმის ყოველდღიურად იმართება, გადაკეტეს ქუჩები და ცეცხლი წაუკიდეს საგნებს.
აქციის მონაწილეები ამბობენ, რომ დაიღალნენ ამ მთავრობითა და მიმდინარე პროცესებით. მათი სურვილია, ახლავე შედგეს მძევლებთან დაკავშირებული შეთანხმება, ისინი სახლებში დაბრუნდნენ და ომიც საბოლოოდ დასრულდეს. მათთვის ის, რაც ღაზაში ხდება, წარმოუდგენელი და აღმაშფოთებელია. აქციის მონაწილეებს სურთ მშვიდობა და ერთად, დაპირისპირების გარეშე, ცხოვრება.
כשמפגינים צריכים להגן בגופם על משפחות חטופים מפני משטרת ישראל, מבינים שמשהו כאן מקולקל. אין לחטופים עוד זמן, חייבים להחזיר אותם. הממשלה הפקירה אותם פעם אחת, אסור לה להפקיר אותם שוב
בסרטון: מפגינים מגינים על עינב צנגאוקר מפני המשטרה. מצודת זאב, הלילה pic.twitter.com/eboh5Oj2GQ
— דור שינוי (@the_change_gen) April 29, 2024
მძევლების გათავისუფლებასთან დაკავშირებით მათი ოჯახების წევრებისა და ისრაელის საზოგადოების ნაწილის საჯარო მოთხოვნის პარალელურად იზრდება საერთაშორისო ზეწოლაც. მსოფლიო საზოგადოება ისრაელსა და „ჰამასს“ მოუწოდებს, თვეების განმავლობაში წარუმატებელი მოლაპარაკებების მიუხედავად, დროულადმიიღონ ცეცხლის შეწყვეტის შესახებ გადაწყვეტილება.
ერთ-ერთი მძევლის ოჯახის წევრი აიალა მეცგერი ამბობს, რომ სწორედ ახლაა ის მომენტი, როდესაც მაგიდაზე დევს გარიგება. ეს შანსი არ არის ხელიდან გასაშვები, დრო აღარ ითმენს, მთავრობამ ქმედითი ნაბიჯები უნდა გადადგას. მისი თქმით, აღარ არის მორიგი ომის დრო. რაფაჰში ომის დაწყება მძევლებს სახლში ვერ დააბრუნებს.
ისრაელმა პირობა დადო, რომ ღაზის სამხრეთის მჭიდროდ დასახლებულ ქალაქში სახმელეთო ოპერაციას დაიწყებს, სადაც, მათი მტკიცებით, „ჰამასს“ ისრაელელი მძევლები ჰყავს გადამალული. „ჰამასი“, თავის მხრივ, აცხადებს, რომ არ გაათავისუფლებს მათ იქამდე, სანამ არ შედგება შეთანხმება ომის დასრულებასთან დაკავშირებით.
