ახლო აღმოსავლეთში ვითარება იძაბება.
სირიისა და იორდანიის სახელმწიფო საზღვრის სიახლოვეს, სამხედრო დრონებით მიტანილი იერიშის შედეგად სამი ამერიკელი ჯარისკაცი დაიღუპა, 20-ზე მეტი კი დაიჭრა.
“სამხედრო დრონებით იერიში რიგით 22-ე სამხედრო ბაზაზე მიიტანეს, ეს ბაზა სირიისა და იორდანიის სახელმწიფო საზღვრის სიახლოვეს მდებარეობს და ის “ისლამური სახელმწიფოს” წინააღმდეგ სამხედრო კამპანიის წარმოებისას ააშენეს. უცნობია, თუ რა ზიანი მიადგა სამხედრო ბაზას, დაღუპულია სამი ამერიკელი ჯარისკაცი და დაჭრილია 20-ზე მეტი”, – ამბობს ჯონ გამბრელი, AP-ის ჟურნალისტი ახლო აღმოსავლეთში.
I am outraged and deeply saddened by the deaths of three of our U.S. service members and the wounding of other American troops in an attack last night against U.S. and Coalition forces, who were deployed to a site in northeastern Jordan near the Syrian border to work for the…
— Secretary of Defense Lloyd J. Austin III (@SecDef) January 28, 2024
ამერიკის შეერთებული შტატების პრეზიდენტი ბრალს სდებს ერაყში მოქმედ და თეირანის მიერ მხარდაჭერილ ორგანიზაციას, სწორედ ამ ძალებს მიაქვთ სხვადასხვა შეიარაღებით იერიშები ახლო აღმოსავლეთში მდებარე ამერიკულ სამხედრო ბაზებზე ისრაელსა და “ჰამასს” შორის დაწყებული ომის შემდეგ.
“ძალიან მძიმე მომენტია ჩვენთვის, ჩვენს ერთ-ერთ სამხედრო ბაზაზე იერიში მიიტანეს და სამი მამაცი ჯარისკაცი დავკარგეთ, ჩვენ შესაბამის პასუხს გავცემთ მტერს”, – განაცხადა ჯო ბაიდენმა, ამერიკის შეერთებული შტატების პრეზიდენტმა.
რესპუბლიკური პარტიის საპრეზიდენტო კანდიდატობისთვის მებრძოლმა ორივე პოლიტიკოსმაც გააკეთა განცხადებები. დონალდ ტრამპის თქმით, თეთრ სახლში მისი ყოფნის შემთხვევაში ახლო აღმოსავლეთში ამერიკელ ჯარისკაცებზე თავდასხმას ვერავინ გაბედავდა. ხოლო ნიკი ჰეილის თქმით, ეს სამარცხვინო თავდასხმა გახლდათ.
“დღეს სამი გმირი დავკარგეთ, ბევრი კი დაჭრილია. ჩვენს სამხედროებზე ბოლო პერიოდში უკვე 160-ზე მეტი იერიში მიიტანეს, ეს სამარცხვინოა, დაღუპულთა და დაჭრილთა ოჯახებს ჩვენი თანადგომა ესაჭიროებათ”, – განაცხადა ნიკი ჰეილიმ, გაეროში აშშ-ის ყოფილმა ელჩმა.
იემენში მოქმედ ჰუსიტებსა და დასავლეთს შორის მიმდინარე დაპირისპირების, “ჰამასსა” და ისრაელს შორის მიმდინარე ომისა და ისრაელსა და “ჰეზბოლას” შორის სავარაუდო ომის ფონზე, ახლო აღმოსავლეთში ვითარება იძაბება.
