ცენტრალურ ღაზაში, მაღაზის ლტოლვილთა ბანაკში, საცხოვრებელ რაიონზე ისრაელის სარაკეტო იერიშს სამოცამდე ადამიანი ემსხვერპლა. მოქალაქეები და საგანგებო სამსახურის წარმომადგენლები ნანგრევების ქვეშ მოყოლილი ადამიანების პოვნასა და გადარჩენას ცდილობენ.
მოქალაქეები ამბობენ, რომ ისრაელი მიზანმიმართულად ესხმის თავს მშვიდობიან მოსახლეობას. ისინი დევნილებად იქცნენ, მათ ურჩიეს, რომ ცენტრალურ ღაზაში გადასულიყვნენ, თუმცა იქაც დაბომბეს. მოქალაქეების თქმით, ღაზაში უსაფრთხო ადგილი აღარ არსებობს.
დაჭრილები და დაღუპულები ალ-აქსას საავადმყოფოში გადაიყვანეს. როგორც ღაზის ჯანდაცვის სამინისტროში აცხადებენ, ისრაელსა და „ჰამასს“ შორის ომის დროს ისრაელის ცეცხლსა და საჰაერო იერიშებს 20 000 პალესტინელი ემსხვერპლა.
საბრძოლო მოქმედებები შვიდი ოქტომბრის შემდეგ დაიწყო, როდესაც „ჰამასის“ მებრძოლები ისრაელის ტერიტორიაზე შეიჭრნენ და 1200 ისრაელელი დახოცეს, 240 ადამიანი კი მძევლად აიყვანეს.
