გაეროს გენერალურმა ასამბლეამ კენჭისყრაზე ხმათა უმრავლესობით ღაზაში ცეცხლის შეწყვეტა მოითხოვა.
193 წევრისგან შემდგარ ორგანიზაციაში ცეცხლის შეწყვეტას 152-მა ქვეყანამ დაუჭირა მხარი, 10 წინააღმდეგი იყო, ხოლო 23-მა თავი შეიკავა. უშიშროების საბჭოს რეზოლუციას ღაზაში ცეცხლის შეწყვეტის შესახებ გასულ კვირას შეერთებულმა შტატებმა ვეტო დაადო. მისგან განსხვავებით, გენერალური ასამბლეის რეზოლუცია არ აკისრებს ქვეყნებს ვალდებულებას, თუმცა მსოფლიოს საზოგადოების აზრის გამოხატვის მნიშვნელოვანი საზომია. კენჭისყრამ ასევე აჩვენა, მათგან რამდენად განსხვავებული პოზიციები აქვთ შეერთებულ შტატებსა და ისრაელს.
The UN General Assembly overwhelmingly adopted a resolution on the Middle East demanding a humanitarian ceasefire.
The resolution calls for the protection of civilians, the immediate, unconditional release of all hostages and humanitarian access. https://t.co/DDxlBTU8M6 pic.twitter.com/7Heyq3YnGf
— United Nations (@UN) December 13, 2023
მანამდე ვაშინგტონში პრეზიდენტმა ჯო ბაიდენმა თეთრ სახლში ხანუქას დღესასწაულთან დაკავშირებით მიღება გამართა და შეკრებილ სტუმრებს განუცხადა, რომ შეერთებული შტატები გააგრძელებს ისრაელისთვის სამხედრო დახმარების გაწევას მანამ, სანამ „ჰამასს“ არ გაანადგურებენ. თუმცა დასძინა, რომ ისრაელი კარგავს მხარდაჭერას ღაზის ტერიტორიისა და მშვიდობიანი მოსახლეობის დაბომბვის გამო.
მან ასევე პრემიერ-მინისტრ ბენიამინ ნეთანიაჰუს მოუწოდა, შეცვალოს კოალიციის წევრები, რომლებიც ეწინააღმდეგებიან პალესტინის სახელმწიფოს შექმნას.
ამავდროულად, ისრაელი აგრძელებს ღაზის სექტორის დაბომბვას
ინტენსიური ბრძოლა ახლა ძირითადად სამხრეთის ქალაქ ხან-იუნისზეა გადატანილი. ბრძოლები მიმდინარეობს ასევე ეგვიპტის საზღვართან, რაფაჰშიც.
ჯანდაცვის მსოფლიო ორგანიზაციაში აცხადებენ, რომ ისრაელის მიერ ღაზის სექტორის დაბომბვის გამო 36 საავადმყოფოდან მხოლოდ 11 ფუნქციონირებს. მათი თქმით, ისრაელმა 18 200-ზე მეტი ადამიანი დახოცა.
ისრაელის სამხედრო ოპერაცია შვიდი ოქტომბრის თავდასხმების შემდეგ დაიწყო, „ჰამასის“ ისრაელში შეჭრას 1200 ადამიანი ემსხვერპლა. მათ გაიტაცეს 240-ამდე მძევალი, რომელთა ნაწილი ცეცხლის შეწყვეტის ხანმოკლე ზავის დროს გათავისუფლდა.
