უკრაინის ხელისუფლების წარმომადგენელთა განცხადებით, მათმა ჯარმა მდინარე დნეპრის აღმოსავლეთ ნაპირზე პოზიციების დაკავება და შენარჩუნება შეძლო, სამხრეთის ფრონტის ხაზზე მდინარე დნეპრი რუსული თავდაცვითი სტრატეგიის ერთერთი მნიშვნელოვანი შემადგენელი ნაწილია. ეს ინფორმაცია უკრაინის პრეზიდენტის ადმინისტრაციის უფროსმა ანდრეი ერმაკმა ვაშინგტონში ვიზიტისას გაავრცელა. ხერსონის რეგიონში, მდინარე დნეპრის გასწვრივ, მოსკოვმა სამხედრო შენაერთები ზაპოროჟიეს რეგიონში განალაგა, იმ რეგიონში, სადაც 4 ივნისიდან მოყოლებული უკრაინული არმიის კონტრშეტევა შეზღუდული წინსვლით მიმდინარეობს. უკრაინული არმიის წინსვლას ადასტურებენ კრემლში.
ანდრეი ერმაკი, უკრაინის პრეზიდენტის ადმინისტრაციის უფროსი: “ჩვენ მიერ გაკეთებული არჩევანი მკაფიოა. ჩვენ ვაპირებთ აღვადგინოთ უკრაინის სუვერენიტეტი საერთაშორისოდ აღიარებულ საზღვრებში, მიუხედავად ყველაფრისა, ჩვენმა ჯარებმა შეძლეს მდინარე დნეპრის გადალახვა და მეორე ნაპირზე პოზიციების დაკავება და შენარჩუნება. ასე ნაბიჯ-ნაბიჯ გავათავისუფლებთ ყირიმს. გზის 70 პროცენტი გავლილია და კონტრშეტევა გრძელდება. ვიცით, გამარჯვება როგორ მოვიპოვოთ. პრეზიდენტ ზელენსკის ზუსტი გეგმა აქვს, სხვადასხვა პრიორიტეტებს შორის თავდაცვითი ინდუსტრიის მშენებლობა და ჩვენ მიერვე წარმოებული იარაღის გამოყენებაა, მაგრამ ეს მოგვიანებით, ახლა იარაღი გვჭირდება. რუსეთის ფედერაცია საჰაერო უპირატესობას ფლობს, კრემლი კვლავ აწარმოებს შეიარაღებას, სანქციებისთვის თავის არიდებას, რუსულ არმიას აქვს ირანული დრონები და ჩრდილოეთ კორეული წარმოების ჭურვები. ჩვენ ასევე გვესაჭიროება საჰაერო თავდაცვის სისტემები”.
