ათობით პალესტინელი გადავიდა ეგვიპტეში რაფაჰის სასაზღვრო პუნქტიდან

ღაზისა და ეგვიპტის საზღვარზე მდებარე რაფაჰის გამშვები პუნქტიდან ათობით პალესტინელი ღაზიდან ეგვიპტეში გადავიდა. სამი კვირის შემდეგ პალესტინელთა ნაწილს, მათ ვინც მძიმედაა დაშავებული, ან ასევე მათ ვისაც ორმაგი მოქალაქეობა აქვს, ღაზის სექტორის დატოვების შესაძლებლობა მიეცათ. ამ შეთანხმებას მხარეებმა გუშინ მიაღწიეს. 7 ოქტომბრის შემდეგ დაბომბვებმა ღაზის სექტორში ათიათასობით ადამიანს წაართვა სახლი, საკვები და წყალი, ამის მიუხედავად გუშინდელ დღემდე არავის ჰქონდა ტერიტორიის დატოვების უფლება. ღაზა აქამდე მხოლოდ იმ ოთხმა მძევალმა დატოვა, რომელიც “ჰამასმა” გაათავისუფლა.

იდგნენ და ელოდნენ დაჭრილი და ორმაგი მოქალაქეობის მქონე პალესტინელები რაფაჰის სასაზღვრო პუნქტთან საზღვრის გახსნას. ჩემოდნებით, ჩანთებითა და პარკებით, ვინ როგორც მოახერხა ნივთების ჩალაგება. საზღვარი რომ იხსნებოდა ძირითადად, ერთმანეთისგან გაიგეს, ინტერნეტისა და მობილური ქსელების ცუდად მუშაობის გამო, სხვადასხვა ქვეყნის ოფიციალური უწყებები პალესტინაში მყოფ მათ მოქალაქეებს ვერ დაუკავშირდნენ.

„დღეს აქ მოვედით, ეგვიპტის საზღვართან ღაზის სექტორის დატოვების იმედით, მე კანადის მოქალაქე ვარ, საელჩო ვერ დამიკავშირდა ქსელის ცუდად მუშაობის გამო. გუშინ შემთხვევით გავიგე, რომ საზღვარი დილის 7 საათზე იხსნებოდა და აქ მოვედი. წასვლის იმედი მაქვს, მაგრამ ეს იმედიც ძალიან პატარაა. არ ვიცით რა მოხდება“, – ასილ შურაბი კანადის მოქალაქე.

“ეგვიპტურმა მხარემ გვითხრა, რომ დღეს გასასვლელი გაიხსნებოდა იმ მიზნით, რომ ისრაელის სასტიკი დარტყმების შედეგად 81 დაშავებული და კრიტიკულ მდგომარეობაში მყოფი ადამიანი ღაზიდან გაგვეყვანა. მათ გარდა უცხოური პასპორტის მქონე პირებსაც შეუძლიათ გასვლა, ამჟამად ამ ადამიანების სიებს ვამზადებთ”, – ჰიშამ ოდვანი, რაფაჰის სასაზღვრო პუნქტის სპიკერი.

საზღვრის გახსნამდე დაშავებულები სასწრაფო დახმარების მანქანებით მოჰყავდათ.

“ყველა ომი გამოვიარე. ახლა კიდევ ომი რომ დაიწყო, ვიფიქრე, ჩვენი მთავარი პრობლემა ელექტროენერგიისა და წყლის გარეშე ცხოვრება იქნებოდა, თუმცა ჩვენი პრობლემები გაცილებით დიდი აღმოჩნდა. მხოლოდ ღმერთმა იცის, რა გზა გამოვიარეთ, სანამ აქამდე მოვიდოდით. მიუხედავად იმისა, რომ ახლა ქვეყანას ვტოვებ, ის მაინც ჩვენი ქვეყანაა, ვწუხვარ იმის გამო, რომ მას ანადგურებენ, ვწუხვარ ჩემი მეგობრებისა და ახლობლების გამო. განადგურდა, საერთოდ აღარ არსებობს უამრავი ოჯახი”, – რანია ჰუსეინი.

ომში 8700-ზე მეტი პალესტინელი დაიღუპა, ძირითადად ქალები და არასრულწლოვანები, ხოლო 22 000-ზე მეტი ადამიანი დაიჭრა. ეს მაჩვენებელი ისრაელ-პალესტინის კონფლიქტის ათწლეულების განმავლობაში უპრეცედენტოა.