კინო და ტელეოპერატორების საერთაშორისო ფესტივალი „ოქროს თვალი” წელს ქობულეთში განსაკუთრებული ფორმატითა და დღის წესრიგით ჩატარდა. მე-10 საიუბილეო ღონისძიება მთლიანად საქართველოს დაეთმო და კონკურსანტებიც მხოლოდ საქართველოდან შეირჩა. საერთაშორისო ჟიურიმ ფესტივალის ფარგლებში სამ ძირითად ნომინაციაში გამოავლინა გამარჯვებულები. ეს ნომინაციებია: საუკეთესო ტელეოპერატორული ნამუშევარი, საუკეთესო სტუდენტური ნამუშევარი და სარისკო კადრი. საიუბილეო ღონისძიებაზე სპეციალური ჯილდოებიც გაიცა.
ქართულ მედიაში ევროპული ღირებულებებისა და სტანდარტების დანერგვისთვის ამერიკული სამაუწყებლო ასოციაციის ვიცე-პრეზიდენტმა კევინ თრუბალდმა სპეციალური ჯილდო ევრონიუს ჯორჯიას გადასცა. ფესტივალზე ქართველი საზოგადოებისთვის ცნობილი გახდა, რომ თბილისში იხსნება მაუწყებლობის ინჟინერთა ამერიკული საზოგადოების ოფიციალური წარმომადგენლობა. აღმოსავლეთ ევროპელ, მათ შორის ქართველ ოპერატორებსა და ტექნიკოსებს შესაძლებლობა ექნებათ, სასწავლო კურსი გაიარონ და მაუწყებლობის ინჟინერთა ამერიკული საზოგადოების სერტიფიკატი აიღონ.
„ძალიან ბევრი საგანმანათლებლო სერვისი გვაქვს. ჩვენ ვთავაზობთ ონლაინგაკვეთილებს უამრავი მიმართულებით. მთელი წლის განმავლობაში მსურველებს შეუძლიათ, დაესწრონ გაკვეთილებს. სწავლების შემდეგ ჩვენ გვაქვს 20 სხვადასხვა დონის სასერტიფიკატო გამოცდა როგორც აუდიო, ასევე ვიდეო და მენეჯმენტის კუთხით. ასე რომ, მსურველებს შესაძლებლობა ექნებათ, ისწავლონ და დახვეწონ თავიანთი უნარები”, – აღნიშნა მაუწყებლობის ინჟინერთა ამერიკული საზოგადოების აღმასრულებელმა დირექტორმა ჯეიმს რაგსდეილმა.
საიუბილეო ფესტივალის ნომინანტებს აფასებდა საგანგებოდ შერჩეული ჟიური, რომელიც მსოფლიოში ცნობილი ხელოვანებისაგან შედგებოდა. ქართველ რეჟისორებთან ერთად ფესტივალს ესწრებოდნენ კინო და ტელეინდუსტრიისა და საერთაშორისო მედიის წარმომადგენლები.
საზეიმო საღამო და დაჯილდოების ცერემონია მალე დასრულდა, თუმცა ღონისძიების შემდეგ საზოგადოებას ჰქონდა შესაძლებლობა, გასცნობოდა მონაწილეებს და მიელოცა მათთვის. ამ საღამოს მათ მომავალ ურთიერთობასაც ჩაეყარა საფუძველი.
