ბრიუსელში, ნატოს შტაბ-ბინაში, მალე ახალი, ფინეთის დროშა, დაიკიდება. დღეს სკანდინავიური ქვეყანა სამხედრო ალიანსის 31-ე წევრი გახდება, რითაც ორგანიზაციის ისტორიაში ქვეყნის ყველაზე სწრაფად გაწევრების პროცესი დასრულდება.
ნატოს გენერალურმა მდივანმა იენს სტოლტენბერგმა განაცხადა, რომ ეს მნიშვნელოვანი დღეა ფინეთის, სკანდინავიისა და მთლიანად ნატოს უსაფრთხოებისთვის. მისი აზრით, ამ გადაწყვეტილების შემდეგ შვედეთიც უფრო უსაფრთხოდ იქნება.
როგორც ცნობილია, გასულ უქმეებზე გამართულ არჩევნებში დამარცხდა მემარცხენე პრემიერ-მინისტრი სანა მარინი, რომელიც მხარს უჭერდა თავისი ქვეყნის, ფინეთის, ნატოში გაწევრებას.
რუსეთის მიერ უკრაინაში შეჭრამ ფინეთისა და შვედეთის ნატოში გაწევრების პროცესის დაჩქარება გამოიწვია. პროცესს თურქეთი აჭიანურებდა და ამბობდა, რომ ფინეთი და შვედეთი ტერორისტებს უჭერდნენ მხარს. ამავე მიზეზით არ ეთანხმება თურქეთი შვედეთის გაწევრებას.
ნატო ფინეთის ალიანსში გაწევრებას დადებითად აფასებს. ფინეთს რუსეთთან 1340-კილომეტრიანი საზღვარი აკავშირებს. ალიანსის წევრების უმეტესობისგან განსხვავებით, მას ცივი ომის შემდეგ არ შეუმცირებია თავდაცვის ხარჯები. ფინეთს ჰყავს დიდი და კარგად გაწვრთნილი ჯარი, რომელიც მუდმივ მზადყოფნაშია. რუსეთი აფრთხილებს მსოფლიოს, რომ ფინეთის საზღვრის გასწვრივ ნატოს ჯარების განლაგების შემთხვევაში იგი გააძლიერებს საკუთარ არმიას.
