დღეს მთელი დღის განმავლობაში ხმაური იყო ჯანდაცვის სამინისტროსთან. აქონდროპლაზიის დიაგნოზის მქონე ბავშვების მშობლებმა, სამთვიანი ჩუმი აქციების შემდეგ, პირველად ხმაურიანი აქცია მოაწყვეს.
ისინი დღეს შუადღის 12 საათიდან ჯანდაცვის მინისტრთან და მის მოადგილეებთან შეხვედრას ითხოვენ, ჯანდაცვის სამინისტროსთან რჩებიან და დაშლას არც გეგმავენ.
2022 წლის დეკემბრიდან, სამი თვის განმავლობაში ყოველდღე, ჯანდაცვის სამინისტროსთან აქონდროპლაზიით დაავადებული ბავშვების მშობლები იკრიბებოდნენ და მათი შვილებისთვის სასიცოცხლოდ მნიშვნელოვანი წამლის ქვეყანაში შემოტანას ითხოვდნენ.
ამ დროის განმავლობაში სამჯერ ჯანდაცვის მინისტრის მოადგილეს, თამარ გაბუნიასაც შეხვდნენ, თუმცა როგორც მშობლები ამბობენ მთავრობა მათ ატყუებს, წამლის შემოტანას არ აპირებს და დროს წელავს.
დროს, რომელიც მათ შვილებს არ აქვთ. წამალი რომლის შემოტანასაც აქონდროპლაზიის დიაგნოზის მქონე ბავშვების მშობლები ითხოვენ, ამერიკისა და ევროპის წამლების სააგენტოებმა 2021 წელს დაამტკიცეს. ის აქონდროპლაზიის დიაგნოზის მქონე ბავშვმა ყოველდღიურად ინექციის სახით უნდა მიიღოს. თუმცა წამლის მიღებას მანამ აქვს აზრი, ვიდრე ბავშვის ზრდის ზონები ღიაა.
აქციაზე დგანან იმ ბავშვების მშობლებიც, რომელთა ზრდაც ერთ წელზე ნაკლებ დროში დასრულდება, ზრდის ზონები დაიხურება და წამლის მიღებას მათთვის მნიშვნელობა უკვე აღარ ექნება.
სწორედ ამიტომ ამბობენ მშობლები, რომ მათთვის დროს კრიტიკული მნიშვნელობა აქვს. კვლევები აჩვენებს, რომ იმ ბავშვებს ვინც მედიკამენტის მიღება დაიწყეს, შეუმსუბუქდათ სიმპტომები, აღარ განიცდიან ტკივილს და იზრდებიან სიმაღლეში.
ჯანდაცვის სამინისტროში ამ თემაზე კომენტარს არ აკეთებენ.
