შაბათს საბერძნეთის ჩრდილო-აღმოსავლეთში უკრაინული სატვირთო თვითმფრინავი ჩამოვარდა. ნაპოვნია 8 უკრაინელის ცხედარი.
თვითმფრინავმა, რომელსაც სერბეთიდან ბანგლადეშში სამხედრო აღჭურვილობა გადაჰქონდა, კატასტროფა განიცადა. უკრაინის საგარეო საქმეთა სამინიტროში აცხადებენ, რომ შემთხვევის მიზეზი ერთ-ერთი ძრავის გაუმართაობა იყო.
ადგილობრივები ჰყვებიან, რომ თვითმფრინავს დაცემამდე უკვე ცეცხლი ეკიდა, დაცემის მომენტში კი ძლიერი აფეთქების ხმა გაისმა. გაჩნდა დიდი ხანძარი, შემდეგ მოჰყვა დამატებით აფეთქებები, 20 შეიძლება 30-იც.
როდესაც შემთხვევის ადგილი დრონით დაათვალიერეს, ხელისუფლების წარმომადგენლები სახიფათო ნივთიერების გავრცელების დიდ საფრთხეზე საუბრობდნენ,
ხელისუფლებამ ადგილობრივებს მოუწოდა, ფანჯრები დაეხურათ, რადგან ფიქრობდნენ, რომ ძლიერი გამოსხივება იქნებოდა.
სოფელი პანიკამ მოიცვა. გაითიშა ელექტროენერგია. ბავშვები აქეთ-იქით დარბოდნენ, მშობლები კი მათ მისდევდნენ.
როდესაც ექსპერტებმა შეაფასეს, რომ შემთხვევის ადგილი უსაფრთხო იყო, სამაშველო სამსახურის წარმომადგენლებმა ცხედრები გამოიყვანეს. შაბათს ადგილობრივებს შინ დარჩენისკენ მოუწოდეს, თუმცა მათ ახლა სახლების დატოვებაც შეუძლიათ.
