უკრაინის ქალაქ ბუჩიდან შემზარავი კადრების გავრცელების შემდეგ უკრაინის საგარეო საქმეთა მინისტრი დმიტრო კულება აცხადებს, რომ მარიუპოლში ვითარება გაცილებით მძიმეა. რუსული მხარე კი ამბობს, რომ გავრცელებული ვიდეოები რუსეთის წინააღმდეგ დადგმული პროვოკაციაა. ისინი გაეროს უსაფრთხოების საბჭოს სხდომის მოწვევას ითხოვენ, რათა ამის დამადასტურებელი მტკიცებულებები წარადგინონ.
კიევის ოლქის ქუჩები სავსეა მშვიდობიანი მოსახლეობის ცხედრებით. ამ ამბავმა მთელი მსოფლიო შეძრა, რუსეთს ომის დანაშაულში სდებენ ბრალს. მსოფლიო კრემლის წინააღმდეგ უფრო მკაცრი სანქციების დაწესებას ითხოვს. ისინი მოითხოვენ, აიკრძალოს რუსეთიდან საწვავის იმპორტი. ამერიკის პრეზიდენტს ჯო ბაიდენს კი სურს, რომ ვლადიმერ პუტინი სამხედრო დანაშაულებისთვის გასამართლდეს.
პოლონეთიდან ჩართვისას უკრაინის საგარეო საქმეთა მინისტრმა დმიტრო კულებამ განაცხადა, რომ რუსი სამხედროების მიერ ჩადენილი სისასტიკის მიუხედავად, ისინი გაჩერებას არ აპირებენ. მინისტრის თქმით, ვითარება მარიუპოლში გაცილებით მძიმეა.
რუსეთის საგარეო საქმეთა მინისტრმა უარყო ბრალდებები. მისი თქმით, გავრცელებული კადრები რუსეთის წინააღმდეგ დადგმული პროვოკაციაა.
ვასილი ნებენზია, რუსეთის ელჩი გაეროში, იზიარებს სერგეი ლავროვის მოსაზრებას და აღნიშნავს, რომ გაყალბებული ვიდეოების მიზანი რუსული სამხედრო ძალების დისკრედიტაცია, დეჰუმანიზაცია და ასევე, რუსეთზე პოლიტიკური ზეწოლის გაძლიერებაა. მისი თქმით, რუსულ მხარეს აქვს ფაქტობრივი მტკიცებულებები, რომლებიც ადასტურებს მათ განცხადებას. რუსეთის წარმომადგენლებს სურთ, სამხილები დაუყოვნებლივ წარუდგინონ საერთაშორისო საზოგადოებას და გააგებინონ, რომ ეს კიევისა და მისი დასავლელი სპონსორების მიერ გავრცელებული დეზინფორმაციაა.
რუსეთმა სამხედროების დიდი ნაწილი უკვე გაიყვანა კიევის შემოგარენიდან. ისინი ახლა ძალებს დონბასის რეგიონზე კონტროლის დასამყარებლად იკრებენ. დონბასის რეგიონში ძირითადად რუსულენოვანი მოსახლეობა ცხოვრობს, მასში ასევე ქალაქი მარიუპოლიც შედის.
