უკვე 13 დღეა უკრაინელები სიცოცხლისთვის უსაფრთხო ადგილის მოძებნას ცდილობენ და უკრაინის მეზობელ ქვეყანას აფარებენ თავს. რუსეთის ხელისუფლების მიერ უკრაინაში საომარი მოქმედებების დაწყებიდან, პოლონეთის საზღვარი მილიონზე მეტმა უკრაინელმა გადაკვეთა. სასაზღვრო ქალაქ ფშემისლის მერის თქმით, ღამით ყინვა და ბევრი ადამიანის საზღვარზე ყოფნა ვითარებას კიდევ უფრო ართულებს.
,,დრო არ გვაქვს. ძალიან სწრაფად უნდა გამოვიყენოთ ყველა ადამიანი საზღვრიდან. ღამით ტემპერატურა მინუს ორი ან სამია, ამიტომ საზღვარზე გაყინულ ადამიანებს ვერ დავტოვებთ. ასე რომ, რთული ვითარებაა და, ალბათ, უახლოეს მომავალში კიდევ უფრო გართულდება“, – განაცხადა ქალაქ ფშემისლის მერმა ვოიჩეხ ბაკუნმა.
აქ დღე-ღამის განმავლობაში ათობით ავტობუსი ჩამოდის. დაქანცული ლტოლვილები იღებენ მათთვის საჭირო ძირითად ნივთებს – საკვებსა და ტანსაცმელს. საკვებისა და თავშესაფრის გარდა, დაუცველ ლტოლვილებს, ძირითადად ქალებსა და ბავშვებს, უფრო მეტი მზრუნველობა სჭირდებათ.
მეორე მსოფლიო ომის შემდეგ ეს არის ყველაზე სწრაფად მზარდი ლტოლვილთა კრიზისი ევროპაში. უკრაინაში კონფლიქტის გამწვავების გამო პოლონეთის ხელისუფლება აცხადებს, რომ ეს მხოლოდ დასაწყისია. მიუხედავად იმისა, რომ ადგილობრივი ჰუმანიტარული ძალისხმევა უკვე ზღვარზეა, პოლონელების თქმით, მათ მოუწევთ სამიდან ოთხ მილიონამდე უკრაინის მოქალაქის მიღება.
