მთავარი სპორტი ბაკურიანი საერთაშორისო სათხილამურო ფედერაცის ეგიდით მსოფლიო თასის ეტაპებს უმასპინძლებს

ბაკურიანი საერთაშორისო სათხილამურო ფედერაცის ეგიდით მსოფლიო თასის ეტაპებს უმასპინძლებს

სქი ქროსის მსოფლიო თასის ეტაპის მონაწილეები და ორგანიზატორები უკვე საქართველოში არიან. 9 ქვეყნის 51 სპორტსმენი 26 – 28 თებერვალს მონაწილეობას მიიღებს საერთაშორისო სათხილამურო ფედერაციის ეგიდით დაგეგმილ მაღალი დონის შეჯიბრში, რომელიც ბაკურიანში გაიმართება.

შეჯიბრი აღნიშნული ფედერაციის მიერ შემუშავებული COVID  პროტოკოლის, წესებისა და რეგულაციების მკაცრი დაცვით ჩატარდება.

“ სამთო სპორტის სახეობის ტურნირის ჩატარება ბაკურიანში, კოვიდ-პროტოკოლის დაცვით, ქართულ კურორტს ჩააყენებს იმ სამთო – სათხილამურო კურორტებს შორის, სადაც მსგავსი მაღალი დონის სპორტული შეჯიბრები შეიძლება გაიმართოს”, – ნათქვამია ეკონომიკისა და მდგრადი განვიტარების  სამინისტროს მიერ გავრცელებულ განცხადებაში.

შეჯიბრებას საერთაშორისო სათხილამურო ფედერაციის (FIS) მხრიდან დაესწრება სქი-ქროსის სახეობის მიმართულების დირექტორი ავსტრიელი კლაუს ვალდნერი.

ბაკურიანში საკურორტო და სპორტული ინფრასტრუქტურის მოწყობა და მშენებლობა რეკორდულად მოკლე დროში განხორციელდა. სამუშაოები არ შეჩერებულა პანდემიის ყველაზე რთულ პერიოდშიც.

მსოფლიოში კოვიდ-19 პანდემიის გათვალისწინებით, მონაწილეების დაშვება საქართველოში  სპეციალურად მსოფლიო თასების ეტაპებისათვის შემუშავებული წესებით ხდება. კერძოდ, მონაწილეებმა საქართველოში მგზავრობისას უნდა წარმოადგინონ 72-საათიანი ხანდაზმულობის PCR ტესტის უარყოფითი შედეგი; საქართველოში ჩამოსვლისას  გაიკეთონ სავალდებულო PCR ტესტი, ხოლო პირველი PCR ტესტირების შემდეგ, გამგზავრებამდე ყოველ 72 საათში ერთხელ გაიარონ  PCR ტესტირება.

იმის გათვალისწინებით, რომ ბაკურიანი დახურულია დამსვენებლებისთვის, მსოფლიო თასის ეტაპი მაყურებლების გარეშე ჩატარდება. ბაკურიანის მსგავსად,  მაყურებლის გარეშე, გაიმართა მსგავსი მაღალი რანგის სამთო სპორტული შეჯიბრებები ევროპის წამყვან სამთო კურორტებზეც, რომლებიც 2021 წლის ზამთრის სეზონზე ვიზიტორებისთვის დახურული იქნება.

შეჯიბრი საქართველოს მთავრობის მხარდაჭერით, ეკონომიკისა და მდგრადი განვითარების სამინისტროს  „მთის კურორტების განვითარების კომპანიისა“ და საქართველოს სათხილამურო ფედერაციის ორგანიზებით გაიმართება. ღონისძიების პარტნიორი კი  კომპანია „სილქნეტია“.

 

 

უახლესი

სხვა ამბები