სტამბოლში უკრაინისა და რუსეთის დელეგაციების სამშვიდობო მოლაპარაკებები ორ საათზე ნაკლებ დროში დასრულდა. ეს ინფორმაცია ადგილზე მყოფმა მედიამ და უკრაინის დელეგაციის წარმომადგენლებმა გაავრცელეს.
მოლაპარაკებების დასრულების შემდეგ უკრაინულმა მხარემ აღნიშნა, რომ რუსეთის წარმომადგენლებმა არარეალისტური მოთხოვნები წამოაყენეს – პირობები, რომლებიც მნიშვნელოვნად აღემატება ყველა წინა მოთხოვნას, რაც კი რუსეთს ოდესმე წამოუყენებია.
რუსულმა მხარემ მოითხოვა, რომ უკრაინამ გაიყვანოს თავისი ჯარები რუსეთის მიერ ანექსირებული ოთხი რეგიონიდან: დონეცკიდან, ლუჰანსკიდან, ხერსონიდან და ზაპოროჟიიდან. უკრაინული წყაროების თანახმად, რუსეთის დელეგაციას არ ჰქონდა მნიშვნელოვანი გადაწყვეტილებების მიღების მანდატი. უკრაინული მხარის განცხადებით, ისინი მზად არ არიან ომის დასასრულებლად რაიმე მნიშვნელოვანი გადაწყვეტილება მიიღონ.
დღევანდელი მოლაპარაკებების შემდეგ უკრაინის თავდაცვის მინისტრმა რუსტემ უმეროვმა განაცხადა, რომ რუსეთი და უკრაინა „1000/1000-ზე ფორმულით“ ტყვეების გაცვლაზე შეთანხმდნენ. მისივე განცხადებით, თარიღი უკვე ცნობილია, თუმცა ჯერჯერობით დასახელება არ ისურვა.
დღევანდელ შეხვედრას ვოლოდიმირ ზელენსკი და ვლადიმერ პუტინი არ დასწრებიან. უკრაინის პრეზიდენტმა ვლადიმერ პუტინი გააკრიტიკა იმის გამო, რომ მოლაპარაკებებზე „რეალური გადაწყვეტილების მიმღები პირები“ არ გამოგზავნა.
President Trump wants to end this war. We need to keep working closely with him and stay as coordinated as possible. Long-term U.S. support is also essential. An American backstop is needed. It’s important that we all work together, on every level, to make that happen. I thank…
— Volodymyr Zelenskyy / Володимир Зеленський (@ZelenskyyUa) May 16, 2025
მოლაპარაკებების დასრულების შემდეგ უკრაინის პრეზიდენტი ვოლოდიმირ ზელენსკი დასავლელ ლიდერებთან ერთად ესაუბრა ამერიკის შეერთებული შტატების პრეზიდენტს ტელეფონით ალბანეთიდან, სადაც ევროპული პოლიტიკური გაერთიანების მე-6 სამიტი იმართება. ვოლოდიმირ ზელენსკის თქმით, უკრაინა მზადაა რეალური მშვიდობისთვის რაც შეიძლება სწრაფი ნაბიჯები გადადგას და მნიშვნელოვანია, რომ მსოფლიომ მტკიცე პოზიციები დაიკავოს.
