თბილისის საქალაქო სასამართლოში საპროტესტო აქციების დროს დაკავებული 11 პირის სასამართლო პროცესი იმართება. დღეს, 8 მაისს, დაიკითხებიან ის პოლიციელები, რომლებიც დაზარალებულებად ცნეს და პროკურატურამ მოწმეებად წარადგინა.
წინა სასამართლო პროცესზე 11-ივე დემონსტრანტის პატიმრობის საკითხი მორიგ ჯერზე გადაისინჯა. მათი ადვოკატები ბრალდებულების გათავისუფლებას მოითხოვდნენ, პროკურატურა კი პატიმრობის ძალაში დატოვებას ითხოვდა. სასამართლომ პროკურატურის შუამდგომლობა გაითვალისწინა და 11-ივე პირი კვლავ პატიმრობაში დატოვა.
პროკურატურა მსახიობ ანდრო ჭიჭინაძეს, იუმორისტ ონისე ცხადაძესა და კიდევ 9 პირს ჯგუფურ ძალადობაში მონაწილეობას ედავება, რაც ბრალის დამტკიცების შემთხვევაში 4-დან 6 წლამდე პატიმრობას ითვალისწინებს.
