რუსულმა საოკუპაციო ძალებმა დრონებისა და რაკეტების გამოყენებით იერიში მიიტანეს უკრაინის ქალაქ ხარკივზე. დაშავდა 21 მოქალაქე. თავდასხმა საცხოვრებელ რაიონზე განხორციელდა და შედეგად მნიშვნელოვნად დაზიანდა რამდენიმე მაღალსართულიანი კორპუსი. მომხდარი დაგმო უკრაინის პრეზიდენტმა ვოლოდიმირ ზელენსკიმ. ამავდროულად, რუსეთის ბელგოროდის რეგიონზე უკრაინელთა თავდასხმის შედეგად 10 მოქალაქეა დაჭრილი.
უკრაინის ოფიციალური პირების ინფორმაციით, კვირას რუსეთის საოკუპაციო ძალების მიერ უკრაინის ქალაქ ხარკივში მაღალსართულიან საცხოვრებელ კორპუსებზე მიტანილი იერიშის შედეგად 21 მოქალაქე დაიჭრა.
Last night, Russia struck Kharkiv again, this time with aerial bombs targeting an ordinary residential building. As a result, 21 people were injured, including an 8-year-old child and two 17-year-old teenagers. Sixty residents were evacuated from the building. All are receiving… pic.twitter.com/mbLypqbew9
— Volodymyr Zelenskyy / Володимир Зеленський (@ZelenskyyUa) September 22, 2024
შემთხვევის ადგილიდან 60-ამდე მოქალაქე გაიყვანეს, რადგან 16 და 9-სართულიანი კორპუსები სერიოზულადაა დაზიანებული. მას შემდეგ, რაც რუსეთმა 2022 წლის თებერვალში უკრაინაში სრულმასშტაბიანი ინტერვენცია წამოიწყო, ხარკივი ხშირადაა ოკუპანტების სამიზნე.
უკრაინის ლიდერმა ვოლოდიმირ ზელენსკიმ დაგმო თავდასხმა და კიდევ ერთხელ გაამახვილა ყურადღება შორ მანძილზე მოქმედი შეიარაღების აუცილებლობაზე.
კვირას რუსეთმა დრონების გამოყენებით მორიგი თავდასხმა განახორციელა ენერგოსექტორზე უკრაინის ცენტრალური პოლტავის რეგიონსა და ჩრდილოეთის ქალაქ შოსტკაში. რუსეთის ოფიციალური პირების ინფორმაციით, უკრაინელთა მიერ ბელგოროდის რეგიონის დაბომბვის შედეგად 10 ადამიანია დაჭრილი.
