სუპერთასის ფინალურ დაპირისპირებაში ერთმანეთს ჩემპიონთა ლიგისა და ევროპა ლიგის გამარჯვებულები, “რეალ მადრიდი” და ბერგამოს “ატალანტა” შეხვდებიან.
მატჩი 14 აგვისტოს, თბილისის დროით 23 საათზე დაიწყება.
ესპანური და იტალიური კლუბების საფინალო საფეხბურთო შეხვედრა პოლონეთის დედაქალაქ ვარშავაში გაიმართება.
“რეალ მადრიდს” სუპერ თასის ფინალი 8-ჯერ აქვს ნათამაშები, საიდანაც 5-ში გაიმარჯვა და 3-ში დამარცხდა. ხოლო “ატალანტა” სუპერ თასის ფინალს ისტორიაში პირველად თამაშობს.
შესაძლოა დღევანდელ დაპირისპირებაში მაყურებელმა მოედანზე მსოფლიო ფეხბურთის ვარსკვლავი და მადრიდის რეალის ახალწვეული, კილიან მბაპე იხილოს, რომლისთვისაც ეს პირველი ოფიციალური მატჩი იქნება მადრიდის რეალის მაისურით.
“ატალანტა ძალიან კარგი გუნდია. ისინი აქ ყოფნას იმსახურებენ, რადგან მათ დაუღალავი შრომის შედეგად ევროპა ლიგა მოიგეს. გასპერინი ძალიან გამოცდილი მწვრთნელია. ის ჩემი მეგობარია. იუვენტუსში ერთად ვმუშაობდით. სამწვრთნელო კურსებიც ერთად გავიარეთ. ძალიან კარგი ურთიერთობა გვაქვს. ის ტაქტიკურად ძალიან კარგი მწვრთნელია. მიმაჩნია, რომ ხვალ ძალიან რთული შეხვედრა გვექნება.
კილიან მბაპე და სხვა ახალი ფეხბურთელები გუნდს კარგად შემოუერთდნენ. ისინი ჩვენთან 7 ივლისიდან არიან. შესაბამისად ერთად სავარჯიშოდ დიდი დრო არ გვქონია. მაგრამ ჩვენ თავს კარგად ვგრძნობთ. კილიანიც კარგ ფორმაშია. გუნდთან ადაპტირებას კარგად გადის. ხვალ შეიძლება ნებისმიერმა ფეხბურთელმა ითამაშოს.”-განაცხადა მატჩისწინა პრესკონფერენციაზე “რეალ მადრიდის” მთავარმა მწვრთნელმა, კარლო ანჩელოტიმ.
“რა თქმა უნდა, წინ კიდევ უფრო რთული მატჩი გველის ვიდრე ბაიერ ლევერკუზენთან გვქონდა. ლევერკუზენს მთელი სეზონის განმავლობაში შესანიშნავი შედეგი ჰქონდა. ახლა კიდევ უფრო დიდი დაბრკოლების წინაშე ვართ. თუმცა, ამავდროულად მოტივაციაც უფრო დიდი გვაქვს. შეიძლება ხშირად არ ხდებოდეს, მაგრამ ფეხბურთი სიურპრიზებით სავსე სპორტია.
ნათლად ვხედავთ ყველაფერს, რასაც წელს კარლო ანჩელოტიმ მიაღწია. ის მსოფლიოს მასშტაბით ერთ-ერთი ყველაზე ტიტულიანი მწვრთნელია. მან წარმატებას სხვადასხვა ქვეყანაში განსხვავებული გუნდებით მიაღწია. ის ყველა მწვრთნელისთვის სამაგალითოა.”-განაცხადა მატჩისწინა პრესკონფერენციაზე “ატალანტას” მთავარმა მწვრთნელმა, ჯან პიერო გასპერინიმ.
