32 წლის კრისტინა. ერთ-ერთია, რომელიც რუსეთში პუტინის მიერ აღიარებული თვითგამოცხადებული რესპუბლიკიდან ჩავიდა. კრისტინა რუსეთში ორ შვილთან ერთად ცხოვრობს.
“საღამოს, ბარგის ჩალაგებისას ნერვიულობა დავიწყე. ბუნებრივია, ამ სიტუაციაში ყველანი ვღელავთ. ტირილი გვინდა, მაგრამ პატარა ბავშვებს ვუფრთხილდებით. არ ვიცით, რა იქნება შემდეგ. გვითხრეს, რომ დავმსხდარიყავით და მოგვეცადა, თუმცა რას ვუცდით თავადაც არ ვიცით“, – გვიყვება კრისტინა.
ევრონიუსის ჟურნალისტი:
კრისტინა, რას ფიქრობს რუსეთის მიერ რეგიონების აღიარებაზე?
კრისტინა:
“რა თქმა უნდა, აღიარება კარგია. დიდი იმედი მაქვს, რომ ისინი დაგვეხმარებიან. ყოველ შემთხვევაში, ეს სიტუაცია შეიძლება სწრაფად დასრულდეს”.
ადგილობრივმა ხელისუფლებამ 39 ადამიანი როსტოვიდან 60 კილომეტრში, ბენზინგასამართ სადგურთან ახლოს სასტუმროში მოათავსა.
ირინა 9 წლის შვილიშვილთან, ვლადისლავთან ერთად ცხოვრობს. ევაკუაციის გამოცხადების შემდეგ, 15 წუთი მისცეს ნივთების ჩასალაგებლად.
“სამხედრო მოქმედებები ორი დღე გაგრძელდა. საშინელება იყო. ფანჯრები ზანზარებდა, ყველა შეშინებული იყო. ბავშვზე ძალიან ვნერვიულობდით, მაგრამ აზრი არ ჰქონდა. ერთი სული გვაქვს, სახლში როდის დავბრუნდებით, აქ ყოფნა არ გვინდა, მიუხედავად იმისა, რომ კარგად ვართ. რვა წელია, ველოდებით. ამის გამო ჩვენი ბიჭები დაიღუპნენ, რუსეთმა საბოლოოდ აღიარა ჩვენი დამოუკიდებლობა. ჩვენი არჩევანია, ვიყოთ რუსები, რადგან უკან დასახევი გზა არ დაგვიტოვეს”, – ამბობს ირინა.
ევრონიუსის ჟურნალისტი:
აშკარაა, რას ფიქრობენ ეს ადამიანები ვლადიმერ პუტინის გადაწყვეტილებაზე, თუმცა არავინ იცის, როდის შეძლებენ სახლში დაბრუნებას.
83 წლის ალექსანდრა:
“ძალიან გვიხარია, რომ პუტინმა დონეცკისა და ლუგანსკის დამოუკიდებლობა გამოაცხადა. ის დაგვიმეგობრდება, დაგვეხმარება და პენსიებს გაგვიზრდის“.
ევრონიუსის ჟურნალისტი:
გავრცელებული ინფორმაციით, ამ დროისთვის რუსეთში, ბოლო დღეებში 90 ათასზე მეტი ადამიანია ჩასული, რომლებიც არა მარტო აქ საზღვრის სიახლოვეს, არამედ ქვეყნის სხვა რეგიონებშიც არიან განთავსებული.
