ევროკავშირის საგარეო საქმეთა სამსახურის, აღმოსავლეთის სტრატეგიული კომუნიკაციების სპეციალური ჯგუფის პროექტის EUvsDiSiNFO-ს მიერ გამოქვეყნებულ ანგარიშში ნათქვამია, რომ ევროკავშირის ქვეყნებს შორის რუსეთის დეზინფორმაციული კამპანიების სამიზნე ყველაზე ხშირად გერმანია ხდება.
A systematic disinformation campaign against #Germany is playing out both in the pro-Kremlin media and on a political level. https://t.co/KHKUpQZTTd
— EUvsDisinfo (@EUvsDisinfo) March 9, 2021
2015 წლიდან დღემდე პლატფორმის ციფრულ ბაზაში, რომელშიც დეზინფორმაციის გავრცელების შემთხვევებია თავმოყრილი, გერმანიასთან დაკავშირებული 700-ზე მეტი მონაცემი იძებნება. შედარებისთვის, ეს რიცხვი საფრანგეთის შემთხვევაში 300-ია, იტალიის — 170, ხოლო ესპანეთისა კი — 40.
„კრემლი ქმნის გერმანიის მენტალურ ხატს, რომელიც ირაციონალური რუსოფობიის გამომხატველია და იშვიათად თუ გაიგებთ საღ აზრს“, — ვკითხულობთ ანგარიშში.
სტატიაში ნათქვამია, რომ რუსეთი ბოროტად იყენებს იმას, რომ ევროპა და გერმანია მხარს უჭერენ დიალოგს. ანგარიშის მიხედვით, კრემლი და რუსეთის საგარეო საქმეთა სამინისტროს ხელმძღვანელები გამოთქვამენ დიალოგის გამართვის სურვილს, თუმცა პარალელურად არც დეზინფორმაციულ კამპანიებს აფერხებენ და საერთაშორისო ვალდებულებებსაც უხეშად არღვევენ.